Lucknow Super Giants in league a hma hruai turin hnehna pawimawh tak mai inkhel hmuhnawm takah an chang a. Royal Challengers Bangalore lakah ball hnuhnung berah hnehna changin wicket khatin an chak.
Thawhtanni zana Bengaluru a M. Chinnaswammy Stadium a inkhelah Lucknow tan Nicholas Pooran chuan kumin Indian Premier League a half century rang ber a siam a. Ball 15-ah run 50 siam tling derin hnehna an chan nan a pawimawh hle a. Ball 19 atanga run 62 a siam bakah Marcus Stoinis chuan ball 30 atangun run 65 a siam bawk.
Inkhel hmuhnawm
RCB vuak hmasak tir an ni a, over 20 chhungin run 212 an siam. Virat Kohli (61), Faf du Plessis (79*) leh Glenn Maxwell (59) te an che tha a. Lucknow tan chak beisei ngam harsa thamin run an vaw chhuak tha.
Lucknow tan chak a huphurhawm hman viau a, a bikin wicket thum an hloh hnuah run 23 chiah an la siam avangin bul an tan tha tawk lo hle.
Nimahsela Stoinis-a’n ball heh lo takin a team tan hmun a siam a. A out hnuah kum 27 mi West Indies star Pooran a inlar.
6 runs vawi sarih vua a, 4 runs vawi li vua Pooran-a zawhah kum 23 mi Indian batsman Ayush Badoni chuan ball 24 atangin run 30 a siam a, hna pawimawh a chhunzawm.
Badoni-a’n 6 runs vaw lehin a team chakpui a hnaih hman, nimahsela ama wicket ti tla in a out ta zawk.
RCB bowler Harshal Patel chuan ball hnuhnung berah Lucknow wicket hnuhnung ber a ni tawh tih hria in a team chakpui tumin a thluak a vawrh. ‘Mankad dismissal’neih tum mahse a hlawhtling lo. A tawpa ding Avesh Khan leh Ravi Bishnoi ten bye neiin an mamawh run khat an tlan a, over 20-naah chiah run 212 khumin run 213-na an siam.
“Kan chak hi thil mak a ni”
Lucknow captain KL Rahul chuan, “T20-ah chuan no. 5,6 leh 7 te hi batting a position pawimawh ber an niin ka hria. Hei hi inkhel hautak takte a hnehna chan theihna lai a ni. Top order in ruan siam hnem mahse henga lutte hian hnehna min chanpui thin.”
“Hei vang hian Pooran, Stoinis leh Ayush te lalut turin kan inseng.” tiin a sawi.
“Chinnaswamy-ah ngei kan chak a, ka seilenna hmun a ni. Kan dinhmun ang atanga kan chak kha thil mak a ni.” tiin a sawi bawk.