Court of special judge (Prevention of corruption act)-in eiruk thubuaia thiamloh a chantir Mizoram KVI Chief Executive Officer hlui Lalsawmzuala chu Rs nuai 4 chawi turin a hrem.
Aizawl District court-a special judge (PC Act) Dr HTC Lalrinchhana’n nimin khan Lalsawmzuala hremna hi a puang a, thiamloh chantir a nih avanga tunkar Thawhlehnia jail-a a tan tawh bak chu tan belhtir a ni tawh dawn lova, Rs. nuai 4 chawi turin hrem a ni thung a, pawisa a chawitur hi a pe theilo a nih chuan kum 2 dang lungin a tan belh thung ang.
Court-in Lalsawmzuala hremna nep zawk pek a nih chhan hrang hrang a tarlan danin, pawisa chingpen chu a mimal tan a lo kawl emaw a lo nei tih finfiahna a awm lova, kum upa tawh tak, hriselna tha tawh lo a nih avanga lungin-a rei tak dah tur chi a nih loh avang te leh Lalsawmzuala chu tun hmain criminal thubuaiah thiamloh chantir a la nih ngai loh vang te a ni.
Tarlan tawh angin, Lalsawmzuala hi KVI- CEO a nih laia Saitual khua leh a chhehvela Fu chingtute loan rulhsakna sum atanga Rs 9,08,369 khawih chingpenah leh Khuai khawi tanpuina sum Rs nuai 86.63 tichingpen-ah te puh a ni a, a tih chingpen zat hriat ni lo mahse, a tichingpen ngei tih erawh finfiah a ni. Hengte avang hian dan leh kalphung ang ni lova dikhlel taka pawisa hman khawloh leh sorkar lehkha pawimawh tih dik loh leh lehkha diklo siamah te thiamloh chantir a ni.