MPCC office bearers nimina thukhawmin, “Congress sorkarin harsatna tam tak paltlanga kum 2018-a Medical college a din, Mizoram Institute of Medical Education and Reasearch (MIMER), MNF sorkarin Zoram Medical College (ZMC) tia hming a thlak takin MBBS first batch result tha tak a nei ta hi lawmawm kan ti” an ti.
MPCC hruaitute chuan doctor zirlai hmasaber 95 zinga pass zirlai 68 (71.57%) te leh thawktute zawng zawng an lawmpui thu sawiin, hlawhtling ve ta rihlote pawh hlawhtling zui ngei turin duhsakna an hlan bawk.
Mizoramin Medical college a neih theihna tura tha thawhtu zawng zawng, Chief Minister hlui Lal Thanhawla leh Health Minister Lal Thanzara te, sum mamawh ngaihtuahtu, a hunlaia Finance Minister Lalsawta leh hotu dangte, official te an hre reng tih sawiin, “an thawhrim zara medical college nei thei kan ni tih hre reng turin Mizoram mipuite kan ngen” an ti bawk.