Sudan-a sipai leh paramilitary force-ten an rama thuneitu zawk nih inchuha an indona a chhuah avangin boruak a sosang hle a, civil mi 50 chuang an thi tawh nia sawi a ni.
An khawpui, Khartoum-ah chuan mi chengten presidential palace, state TV leh army headquarters-a inkahna thawm a tam thu an sawi.
Doctor pawl chuan an khawpuiah hian mi civil mi 17 telin mi 25 an thi tawh niin an sawi.
Sipai chak tak pahnih indona hi mipui rorelnaa an ram dah tuma rawtna kal zela thuneihna inchuhna awm avanga chhuak a ni.
Army leh Rapid Support Force (RSF) hian Khartoum-a thlawhna tumhmun leh hmun pawimawh dangte chu Inrinni zana an inbeih hnuah a thununtu zawkah an inchhal ve ve.
Pathianni tukah pawh khan Khartoum nena inzawm, Omdurman, a bula Bahri-ah laipui puak thawm a la nasa hle a. Red Sea kama Port Sudan-ah pawh silai a puak niin an sawi bawk.
Army chuan jet-in RSF hmun an kap tih an sawi a, air force chuan Inrinni zan khan mite chu inah tawm vek tur leh an ram pumah buaina chhuak thei a nih thu an sawi.
Khartoum-a cheng pakhat chuan mi an chiaiin an hlau hle tih a sawi a, pakhat phei chuan an thenawm chiahah silai a puak tih a sawi.
Sudanese doctors’ committee chuan khawpui leh region hrang hrangah civil mi 56 an thi tawh tih an sawi a, sipai pawh thi an awm nual a, thenkhat chu damdawi ina enkawl an nih thu an sawi.
Hliam tuar mi 595 an awm tawh bawk.
Khawthlang lama sipai hmun, Kabkabiya-a inbeihna thleng avangin World Food Programme (WFP)-a thawk mi pathum an thi.
Sudan ram hi sipai lalten October, 2021-a sorkar an paih thlak hnuah thuneihna an chang.
Tuna indo mekte hi Gen Abdel Fattah al-Burhan-a hnuaia awm army unit-te leh Sudan-a deputy leader, Hemedti-a tia an koh bawk, Mohamed Hamdan Dagalo-a kaihhruai RSF te an ni.
Hemedti-a hian a sipaite chuan army hmun zawng zawng an lak hma chu an bei zel dawn tih a sawi.
Hetih lai hian sipaite pawhin ‘paramilitary RSF chhut chimih’ a nih hma chu indawrna kalpui an tum lo tih an sawi ve bawk.