UN hnuaia raltlante buaipuitu, UN High Commissioner for Refugees (UNHCR) chuan khawvel puma raltlan mi maktaduai 82 awmin a tam ber lai a nih thu a sawi.
Kum 10 liam ta aiin a letin an tam zawk a, khawvel puma mihring cheng 1% chuang mah chu chenna tur mumal nei lo tihna an ni.
UNHCR hian hripui leng hian ram danga inhumhimna dil leh ram danga pem hi nasa takin a tlakhniam phah niin a sawi bawk.
Heti chung hian nikum chhung khan mi maktaduai 11.2 zet vakvaiin an awm a, a kum hmasa aiin an tam zawk tih a sawi.
Tam tak hi an chenna hmuna tihduhdahna, buaina chhuak, tharum tawhna leh mihring dikna chanvo palzutsak nasat an nih avanga chhuahsan an ni.
Chenna chhuahsana hmun dang pante hi a tam ber chu hri leng avanga ram danga luh mai a harsat avanga anmahni ram chhung veka vakvai an ni.
UNHCR-in Global Trends Report a tihchhuah tharah raltlan zinga mi 2,50,000 chauh an chhuahna ramah an kir leh a, mi 34,000 chu an chhuahna ram an kalsan bakah ram dang an thlen hnuah ram dang an zuan leh niin a tar lang .
UNHCR hian hun reilo teah raltlan leh hetianga vak rawlai hi mi maktaduai 100 an tling thuai dawn niin a sawi.
“An awmna chhuahsan ngai khawpa buaina chhuak leh tihduhdahna thleng thin hi nasa zawka ngaihven a tul tak zet a ni,” tiin UN High Commissioner for Refugees Filippo Grande chuan a sawi.
UN hnuaia mi hian kuminah coronavirus avanga inkhuahkhirhna thlahdul a ni tan tawh a. Ei bar dinhmun erawh nasa takin a hniam a, buaina chhuak a tam a, hripui nghawng mamawh kham lohna nasa tak a awm bawk avangin raltlan hi an tam lehzual a rinawm niin a sawi bawk.
South Sudan, Central African Republic leh Syria chu tampui mitthi thlen mai theihna ram niin an report-ah hian an tar lang.
Raltlan leh chenna mumal nei zahve aia tam, mi maktaduai 48 chuang chu anmahni ram chhung veka vakvai an nih thu UNHCR hian a sawi bawk.
Hripui avangin ram tam takin an ramri an khar a, ram thenkhat erawh chuan hetianga vakvaite hi an la dawngsawng tho niin UNHCR hian a sawi a. Uganda pawhin DR Congo khawchhak lama buaina chhuak avanga an rama lut duhte chu luh an phalsak a, Covid-19 an kai leh kai loh a endik hmasak vek bawk.
Raltlana ram dang pan zinga hmun thuma thena hmun hnih chuang hi ram pangaa mite chauh an ni.
Heng zingah hian kum 10 zet tual chhung buaina lo chhuah tawhna, Syria pawh a tel a. Mi maktaduai 13.5 vel, an ram mipui zahve aia tam chu chenna mumal nei lovin an awm mek a. He ram mi raltlan zahve aia tamin an ram an chhuahsan a, a la bângte hi an ram chhungah an vakvai mek.
Mahni ram chhuahsana ram dang pan ta hmun lia thena hmun thum dawn hian ram hla tak pan lovin an ram thenawm chiah an pan hlawm bawk.