Army chuan Assam khawthlang lama an awm hmunte chu boruak a ziaawm zel avangin an chhuahsan tan mek.
“Assam hi kum tam tak chhung chu helnain bu a khuar thin a. Indian Army pawhin an state chhung hmun hrang hranga hlauhawm zualte phei chu an thutchilh nasa hle a. Hun a kal zel a, sipaiten an awmchilh district tam takah chuan nunphung a pangngai tawh hle a ni,” tiin army press office chuan a sawi.
Army hian South Salmara-a Hatsingimari camp chu an chhuahsan tawh a. Mankachar-a an camp-te pawh an chhuahsan tawh hlawm nia hriat a ni.
“Camp hi a awmna hmuna sorkar kutah leh venhim hna thawktu dangte hnenah hlan fel a ni tawh,” tiin Assam khawthlang lama army officer pakhat chuan a sawi.
“Sipaiten Company Operating Base an chhuahsan lai hian tual chhung mi thenkhat leh sipai bângte pawh an awm a. Sipaiten an chhehvel an chhuahsan chu an lawm hle a, an district-a nunphung pangngai a awm leh theuh nana Army hna thawh zawng zawngah lawm thu an hrilh bawk,” a ti.
Hetianga sipaiten ram buai lai an chhuahsan tih puan a nih mek lai hian February 25 daih tawhah khan Assam Governor Jagdish Mukhi chuan Assam state pum chu ‘ram buai’ (Disturbed Area)-ah thla ruk dang a puan chhunzawm ve thung.
Sorkar mi pawimawhte chuan an state hmun hrang hrang leh hmarchhak hmun danga venhim hna thawkten beih an tawk fo leh ralthuam thahnem tak tak hai chhuah a la ni fo chu governor-in ram buaia a la puan chhan niin an sawi.