Aizawl : Champhai khawpui kianga luang Keilungliah lui khuah enkawl kawnga mawhphur tura sorkarin a din committee-in Agriculture department-in thal thlai chawmna atana Keilungliah tui lak an dilna chu zirchiang turin line department-te an ruat.
Keilungliah enkawl kawnga mawhphurtu committee hi nimin khan an Chairman, Champhai Bawrhsap James Lalrinchhana hovin an thukhawm a. He tuikhuah tlawh man bithliah hrang hrang December ni 15, 2022 atanga hman tan chu tidanglam lova hman zui zel rih ni se, an ti a. He tuikhuah tlawh tur ni lo, he tuikhuah paltlang thin te hnenah erhawh chuan he tuikhuah tlawh man bithliah chanve lak ni se, an ti.
He tuikhuah tlawh man bithliah hrang hrang hman mek chu – puitling tan Rs 20, naupang tan Rs 10, two wheeler luh man Rs 20, three wheeler Rs 30 leh four wheeler Rs 50 a ni.
Bawrhsap hova thukhawm chuan tuikhuahnaa lirthei lian kal tlang thinin tuikhuah himna a nghawng theih avangin LMV chunglam tan kaltlang khap ni se, an ti a. Keilungliah leh a chhehvela nungcha leh thingte humhalh tlat a nih avangin Sangha leh nungcha dang man lo tur te, a kama thingte tichereu lo tur te in mipui an chah bawk.