Lunglei Municipal Council (LMC) hnuaia councillor 11-te rinawmna thu tiamtira lak luhna hun chu nimin khan Convention Centre Hall, Lungleiah neih a ni.
LMC Chief Executive Officer H. Lalhmingthanga kaihhruai lawm luh inkhawmah hian councillor thlan thar 11-te hian Lunglei Municipality hnuaia councillor a thlan tlin an nih anga sorkar danpuiin a phut angin, rinawm tur leh an kova tla apiangte hlen chhuak tura Pathian hminga intiamin district magistrate leh District Municipal Election Officer ni bawk, Ramdinliani’n a la lut a ni.
Ramdinliani kaihhruaina vek hian LMC hruaitute thlan nghal a ni a, LMC chairman atan Lalzuithanga, Councillor Ward No. III thlan a ni a, vice chairman atan K. Lalrinawma, Ward No. VII thlan niin; chairman leh vice chairman an nihna anga rinawmna thu tiamin lak luh nghal an ni bawk.
LMC Chairman Lalzuithanga hian LMC executive councillor pahnih, Lalhruaitluangi Sailo, Ward No. I leh Zorinsanga Hmar, Ward No. IX te a ruat a, anni pawh hi rinawmna thutiam tiamin lak luh nghal an ni.
Councillor rinawmna thutiam la a lak luhte hi Lalhruaitluangi Sailo (Ward I), Lalmuanpuii Renthlei (Ward II), Lalzuithanga (Ward III), R.Lalramzauva (Ward IV), Zonunmawii (Ward V), R.Lalremsiama (Ward VI), K.Lalrinawma (Ward VII), Malsawmkimi Khawlhring (Ward VIII), Zorinsanga Hmar (Ward IX), Judy Lalhriatpuii (Ward X) leh Vanlalliana Pachuau (Ward XI) te an ni.
Nimin vek khan Board of Municipal Meeting hmasa ber chu Convention Conference Hall ah an nei nghal.