Aizawl: Chhimphei Focus chuan nimin khan Zoram Medical College/State Referral Hospital Poor Fund-ah damlo harsate tanpuina atan concert an buatsaih atangin sum an hmuh Rs 35,750 an hlan.
Chhimphei Focus hian ZMC/SRH-a damlo harsate puihna atan poor fund-a chhun luh turin March 31, 2023 khan Sateek Futsal Ground-ah concert an buatsaih a, chuta tang chuan sum an hmu chu an chhung lut.
Poor fund hlanna inkhawm hi ZMC Director office-ah neih a ni a, Chhimphei Focus hnuaia Concert Organising Committee Chairman Lalrindika’n ZMC Director Dr John Zohmingthanga hnenah a hlan.
Chhimphei Focus President T Zoliana chuan an pawl din chhan chu chhimphei (Hualngohmun leh Sailam inkar) huam chhunga puih ngaite tan eng emaw kawng tala malsawmna ni tura hmalak a nih thu a sawi a, “Hmalakna hmasa atan ZMC-a awm damlo harsa zual tan hma kan la a ni,” a ti a; charity concert an buatsaiha thawhlawm thawhtute chungah lawmthu a sawi bawk.
ZMC director chuan an damdawi ina damlo awm zinga khawsak harsate puihna tura Chhimphei Focus-in sum thahnem tak an pe chu an lawm tak zet thu sawiin, an kal zelna turah duhsakna a hlan.