- Ruata
Volkswagen (VW) India chuan kum 2022 June thla khan Virtus midsize sedan thar an tlangzarh a, market lamah a che tha hle a, ram chhunga tlangzarh a nih atanga kum khat a ni ta a. He hun lawmna atan hian German lirthei siamtu hian he lirthei hi manual variant thar leh special edition te hmangin huang a zauh dawn a. Volkswagen Virtus variant thar man hi June 2023 hian puan a ni ang, lei theih tura tlangzarh hun erawh a la hriat loh deuh a ni.
VW lirthei hi Mizoramah pawh a mikhual lo hle a. VW Polo leh VW Vento te hi chu a awm nual tawh a. Tunah kan han tarlan Virtus hi midsize sedan huanga mi niin he huangah hian Hyundai Verna, Maruti Suzuki Ciaz bakah lirthei dang dang kan hmu a. Sedan khan sang leh chak tha tak a ni a, market lamah pawh a chhuahna a la rei loh ang aiin a che tha hle a. Market lamah pawh tuna a thar rawn chhuak tur nen chuan a chet that chhoh zel a beiseiawm a ni.
A thar chu le!
Manual version thar hi GT Plus trim sang zawk nghahchhana duan a ni dawn a, 1.5L TSI petrol engine (150bhp/250Nm) leh 6-speed manual gearbox te a nei dawn a. Tunah chuan 1.5L TSI petrol motor hi 7-speed DSG automatic gearbox nen chauh a chhuak rih a, hei hi GT Plus variant atan chauh ruahman a ni. Sedan manual variant thar hi tun hnaia an tlangzarh thar Hyundai Verna nen an inel tawk dawn khawp mai a, 160bhp power pechhuak thei, 1.5L turbo petrol engine thar a hmang thung a ni.
A chunga kan sawi tawh ang khan Volkswagen Virtus-ah hian special edition thar a awm dawn bawk a, chung zingah chuan GT Edge Limited Collection, Deep Black Pearl finish nei a awm ang a. Manual leh automatic gearbox duhthlan tur a awm dawn a ni. Hei bakah hian Virtus sedan tharah hian tunhnaia Skoda Slavia model lineup (Anniversary Edition leh Kushaq Lava Blue Edition)-a kan lo hmuh tawh Lava Blue color thar a awm dawn bawk a ni.
German lirthei siamtu hmingthang leh hlun tak VW atanga sedan mawi leh tha tak kan neih mek an rawn tuaithara, duhthlan tur dang an rawn dah belh tur hian midsize sedan huang lirthei ngainatute a tihlawm viau a beiseiawm a. Duhthlan tur tam zawk, mipuite mamawh leh duhzawng hre rengin company hian an rawn tichhuak a ni a. Market lamah pawh nghawng duhawm tak a neih a beiseiawm a, company dangte tan pawh intihsiakna a siam tha zual ang a, company dangah pawh lirthei tha lehzual leh duhthlan tur tam lehzual a chhuah theihna turin kawng a rawn hawn te pawh a rinawm viau a ni.
Volkswagen hmalakna dang
Volkswagen hian entry-level electric car thar siam tumin hma an la mek a, hei hi VW ID 2 electric hatchback MEB FWD platform-a nghahchhana duan a ni dawn a. Hei hi a concept chu phochhuah a ni tawh a. ID 2 small-battery EV hian Volkswagen design language thar mawi tak a rawn pu dawn a ni. India tana VW EV thar hi kum 2025 hnu lama chhuak tur compact SUV huanga mi a nih hmel a, he lirthei hian Hyundai Kona EV, MG ZS EV leh Mahindra XUV400 te a el thei dawn a ni.