Aizawl: Serlui bialtu MLA Lalrinsanga Ralte-in Saiphaia in hmun nei lote tana in hmun a leisak mi 26-te hnenah nimin khan in hmun hlan an ni.
Dinthar Veng, Saiphai-ah in hmun hlanna inkhawm neih niin Saiphai VCP Zokhumthanga, Chairman, In hmun Committee chuan inkhawm a kaihruai a. Khuallian bialtu MLA Lalrinsanga Ralte chuan in hmun la nei lote pawh an mamawh dan ang zel a ngaihtuah chhunzawm zel a tum thu a sawi a. Mi rethei leh harsa zawk te, mi mal, chhungkua leh khawtlanga harsatna neite tan ke a pen zel tur thu a sawi a. Harsatna nei chuan inthlahrung hauh loa bepawp thin tura chahin, an tan theihtawp a chhuah zel tur thu a sawi.
Bialtu MLA chuan Saiphai chu Mizoram ramri depa awm khaw pawimawh tak an nih avangin sorkar pawhin a ngai pawimawh a, Saiphai khawtlangah hmasawnna tam tak tun sorkar hun chhung reilo te-ah hian a thlen tawh thu a sawi a. Saiphai mipuite chu ram leh hnam tana an hnathawh hrang hrang leh ramri humhalhna tura theihtawp chhuaha an inpek naah te lawmthu a hrilh bawk.
Saiphaia inhmun nei lote tana bialtu MLA Lalrinsanga Ralte-in in hmun a leisak hi mi 26-te hnenah pek a ni a. In hmun an pek turah hian a dawngtu tur dik takten an dawn theih nan Saiphai VCP kaihhruaina hnuaiah committee din a ni a, he committee-ah hian Saiphai All NGO leh all-party aiawhte an tel kim vek a ni.
In hmun inhlanna inkhawmah hian in hmun nei lo an pekte hian an in hmun tur hi an pawt nghal a ni.