Khaw lumin Mizoram a tuam mek karah zirna in khar tumna a awm lo va, education department-in naupangin harsatna an tawh lohna turin zirna inte zawm tur thurawn a tichhuak thung a. Khaw lum avang hian Aizawl khawpuiah traffic a jam loh phah niin a lang bawk.
School Education Director Lalsangliana chuan Thawhlehni khan zirna in zawng zawng zawm tur thurawn tichhuakin khaw lum zual chhung chuan pawn lama infiamna lam chi reng reng tih loh te, class room chhungah emaw, hulhliap hnuaiah emaw hun hmang tam tur te, taksa mamawh tui thianghlim in tam tur te, taksa lawnga ni sa hnuaia awm lo tur te leh a theih chin chinah nihliap khum zel tur tein zirnain te chu thurawn a pe a. Department-in mi thiamte rawn chung zelin zirlaite himna tur a ngaihtuah zel dawn tih a tar lang bawk.
LADC huam chhungah chuan LADC sorkar thupek angin primary sikul naupangten nimin atang khan zingkar atangin sikul an kai tan a, class neih hun chhung zing dar 6 atanga dar 9 inkar a ni.
MADC sorkar pawhin khaw lum zual chhung primary leh middle sikul kai hun tihmain nimin atang khan zing dar 6:30 atanga chawhma dar 11:30 inkarah sikul an kai tan.
Mizoramah khua a la lum chhunzawm zel a, nimina khaw lum zawng 33°C a kai leh a. Khaw lum hian nghawng tam tak neiin, Aizawla lirthei che vel pawh a tlem phah niin a lang.
The Zozam Times zawhna chhangin Traffic Police duty-te chuan Thawhtanni atang khan chhun pachangah chuan kawngpui dungah lirthei tlan chhuak an tlem deuh a, traffic jam pawh a awm lo phah nia an hmuh thu an sawi.