Manchester United chuan an goalkeeper David de Gea chu contract thar ziahpui an hnaih a, club leh player-ten indawrna an neih mekah inremna an nei hnai.
Spanish goalkeeper hian contract a neihlai hi tun season zawh rual hian zo tur a ni a, inremna thar an ziah loh chuan tun nipuiah free transfer in club a chhuahsan thei dawn.
Player hian club-ah cham chhunzawm a duh thu a lo sawi tawh thin a, club lam pawhin contract thar ziahpui an duh. Mahse a hlawh hnem em avangin a hlawh tih tlem an duh ve bawk avangin hun engemaw chen atangin inbiakna an lo nei tawh.
United in contract thar an zawrhah hian a hlawh pangngai anga kal tur tih tlem a ni dawn a, mahse a chetthat dan a zira hlawkna hmuh theih tur a ngah zual dawn.
Club leh player-te hian inremna nei thui tawh mahse contract kalpui dan tur chungchangah la tihfel kim loh an nei niin an sawi bawk. United hian an inrem thei lo a nih chuan May thla hma hian kum khat contract pawhsei theihna a contract neihlaiah an nei hrim hrim bawk a ni.
Kum 32 mi De Gea hi Erik ten Hag-a’n club a enkawl atangin no.1 goalkeeper nghet a ni a, inelna hrang hrangah vawi 47 a inkhel tawh.
Kum 2011 khan Atletico Madrid atangin Manchester a pan a, an tan vawi 500 chuang inkhel tawhin Premier League title, FA Cup, League Cup leh Europa League te a chawi tawh.
United-ah rinrawl ni thin mahse tihsual langsar a nei leh thin a, tunlai football-ah goalkeeper ball pet thiam zawk ten ngaihven an hlawh thin bawk avangin De Gea pawh hi a club lamin thlak mai an hnial lo niin sawi a tam a. United hi goalkeeper thenkhat nen sawizawm an ni fo thin.