AC Milan in kum 2007 a an champion hnua a vawikhatna atan UEFA Champions League semi-final an khel dawn a. Italy champion lai hian tun season a Italy champion ni tura ngaih Napoli chu 1-1 a draw in 2-1 aggregate in an hneh.
Stadio Diego Armando Maradona a inkhelah Napoli in first leg a 1-0 a an tlawmna chu nawhreh an tum a. A tirah pawh bul an tan tha.
Mahse goal khung thei lovin Milan zawkin awmze nei a goal an nawr hmasak chhunah penalty an hmu a. Olivier Giroud-a’n a khung lo.
French striker hian chance tha tak nei lehin Alex Meret bawkin a dansak leh. Mahse a vawi thumnaah erawh fuh tawhin minute 43-naah Rafael Leao chuan metre 65 ball a tlanpui hnuah Giroud a khung turin tha takin a siamsak.
Second half-ah Napoli in Fikayo Tomori handball avangin beisei an nei ve leh a, mahse Milan goalkeeper Mike Maignan chuan Khvicha Kvaratskhelia pet a lo dang tha hle.
Huntawp dawnah Victor Osimhen hmangin goal khat khung ve mahse Partenopei tan khung belhna hun a awm tawh lo.
Milan coach Stefano Pioli chuan, “First leg a 1-0 khan min puih laiin thil a ti harsa ve bawk.” tiin a sawi.