Mizoram a T20 cricket inelna lian Mapuia Memorial Mizoram Cricket League ni thumnaah Chanmarians Cricket Club in Zarkawt Lords Cricket Club an hneh a. Khelh hnih an khelh tawhah hnehna an la chang ve ve.
Suaka Cricket Ground a chawhma inkhelah Chanmarians in vuak thlangin over 20 chhungin run 110 an siam a, wicket 8 an hloh.
Zarkawt Lords in an umna kawngah bul tan chhe lo mahse a khat tawka wicket an hloh zing leh thin an tuar a. Over 20-ah run 98 siamin wicket 9 an hloh.
Chanmarians tan K Lalremruata chuan run 39 siamin, a opener pui Lalhruaizela chuan run 20 a siam bawk. An bowler zingah TC Vanlalremruata chuan wicket li la in maiden over vawikhat a vawm a. Bobby Zothansanga pawhin wicket thum a la.
Zarkawt Lords tan run 20 siam Lalruatdika chu run siam hnem ber a ni.
Inkhel hnuhnung zawkah Ramhlun Venglai CC tan Joseph Lalthankhuma’n over 17-naah four vawikhat leh 6 runs vawikhat vua in a team hnehna a chanpui a. Wicket li in Kulikawn CC an hneh.
RVL tan Joseph-a’n ball 29 atang run 39 a siam a. Over 17.3-ah run 109 an tlin.
Kulikawn in vuak thlangin opener pahnih C. Lalrinsanga leh Vikash Kumar te chuan run 30 leh 44 siamin bul an tan tha hle a. Mahse an chhuah hnuah chhunzawmtu awm lovin over 20 chhungin run 108 bak an siam thei lo.