European champion lai lakah Chelsea in an result an thlak danglam thei lova. Beiseina tlemte nei chungin Stamford Bridge-ah Spanish champion lai mikhual mahse goal hnih an phurh belh a. 2-0 a tlawmin aggregate-ah 4-0 in an tlawm.
Thawhlehni zana UEFA Champions League quarter-final second leg-ah Blues tan 2-0 ni tawh atanga inlehthal a huphurhawm tawh. Mahse tun season a an tluan tlin theih lohna ni fo bawk chu an talbuaina a ni leh a, an tan season harsa ni laiah beisei tur a tlem leh zual.
Buaina ngaiah Blues
Mahni mualah a nih avangin Blues hmabak ko mahse football-ah thleng thei lo a awm lo. Amaherawhchu Real laka beisei nei turin goal khung hma a pawimawh.
Hetiang tur hian Chelsea in football an khel a, an mikhualte lakah football huai khel ngamin chance tha pawh an insiam nual.
First half-ah N’Golo Kante goal khung loh a uiawm a. Marc Cucurella chuan chhunzawm thei lo bawkin an goalkeeper hlui Thibaut Courtois chu an tawn tlang thei lo.
Spanish champion lai in fimkhur takin football an khel a, a hranpa a huaisen a ngai tawh lo tih an hria. Chutihrualin an tawnhriat tha leh team tha an nihna a lang. Hun remchang leh hmunawl an hmuh an chhawr tangkai a, counter-attack hmangin Blues tlarhnung vawi engemaw zah an tibuai.
Second half-ah an hlawhtling ta chiah a. Minute 58-naah Vinicius Junior chuan rang taka counter-attack kalpuiin Rodrygo goal khung tur a siamsak.
Minute 10 a la awmin Brazilian forward bawk a inlar leh a, Federico Valverde thawhrah sengin an goal hnihna a khung.
Carlo Ancelotti-a’n tun season-ah coach anga he trophy hi a tum nga nan chawi tumin a team hma a hruai a. Semi-final ah hian Manchester City emaw Bayern Munich an hmuak.
“Chelsea an kheltha, an inbuatsaih tha tih a hriat. First half kha a wlsam lova, goal khung lovin min siam. Second half-ah erawh hma kan sawn a, kha kha kan chak phah.”
“Final luh kan tum a, mahse minute 180 dangin min la nghak a. Kan tum ang, final khel ngei turin kan inpeih bawk.” a ti.
Hetihlai hian Chelsea hi interim manager Frank Lampard hnuaiah vawi li inkhel tawhin an la tlawm vek.