Yemeni khawpui, Sanaa-a Ramadan puala tanpuina semna hmuna innek buaina thlengah mi 78 vel zet an thi tih thuneituten an sawi.
TV-a video tihlanah chuan Bab al-Yemen venga pungkhawm mipui tam tak chu an che thei lo va, mangang takin an innek a ni.
Nilaini tlaia Maeen School-a pun khawmna hi tanpuina semna niin mi pakhat zelin $9 an chan theihna a ni.
Sanaa hi hel pawl, Houthi an tihin kum 2015 atanga an thunun a ni.
Social media-a video darhah chuan mi tam tak kawtlaiah an tlu a, te thawm a tamin thenkhat chu an che miah lo va. Mi thenkhatin puih tuma an bawihsam lai a lang.
He punkhawmna huaihawttu sumdawng pahnih chu man niin thil thlen dan chhui zui mek a ni tih interior ministry chuan a sawi.
Ministry thupuangtu chuan tual chhung thuneitute thawhpui lova ‘a remchan dang anga thil sem’ chu chhiatna thlen chhan niin a puh.
Mi tam takin hliam an tuar bawk a, an zinga 13 chu an na hle tih Sanaa-a damdawi in thuneitu chuan a sawi.
“Thi zingah hian hmeichhia leh naupang pawh an tel,” tiin Houthi security thuneitu sang pakhat chuan AFP news agency a hrilh.
Associated Press news agency chuan thil thleng hmutu pahnih sawi tar langin mipui pung khawm thunun nan Houthi fighter-ten van lam hawiin silai an hmet puak a, electric wire fuhin a puak zui a. Hei hian a hnhuaia awm mipuite chu a tichiai ta vek niin an tar lang.
Hel pawl hian sikul hi kharin mipui luh an phal lo va, chanchinbumite luh pawh an phalsak rih lo.
Houthi-te hian thi chhungte chu $2,000 theuh leh hliam tuarte chu $400 theuh pek an tum thu an puang.