India chuan mihring cheng tam lamah China chu kumin kum laihawlah a khum tawh dawn niin United Nations-in data a tihchhuah tharah tar lan a ni.
India-a mihring cheng hi tluklehdingawn 1.4286 ni tawh turin UN chuan a chhut a, a thenawma tluklehdingawn 1.4257 aiin maktaduai 2.9 chuangin an tam zawk tawh dawn a ni.
Asian ram pahnih hi kum 70 chuang zet chu khawvela mihring awm hmun thuma thena hmun khat zet chenna a lo ni ngar ngar tawh.
China-ah hian tun hnai kum eng emaw ti chhung chu nau piang an tlem hle a, kum 1961 hnua a vawi khat nan mihring zat pawh a hniam zawngin a kal.
India-a mihring cheng zat tur hi United Nations Population Fund (UNFPA) State of World Population report-in a chhut lawk dan a ni a, he ramah hian kum 2011 hnu lamah chhiarpui a la awm leh rih lo.
Kum 140 zet kum 10 dan zela chhiarpui neih thin tawh chu kum 2021 khan Covid avanga neih loh niin kum 2022-ah sawn a ni a. Kum 2024-a neih turin sawn hlat leh tawh a ni.
UN hnuaia Population Estimates & Projection chief, Patrick Gerland chuan India-a cheng zat dik tak hi hriat theih a nih loh thu leh ‘rinthu leh behchhan rintlak behchhana chhut mai’ a nih thu a sawi.
“India atang hian official data engmah dawn a awm lo,” a ti.
UN chuan an chhut lawknaah hian China-in Special Administrative Region a neih pahnih – Hong Kong leh Macau-a cheng an chhut tel lo tih a sawi a, hmun hnihah hian mi maktaduai 8 chuang cheng tura ngaih a ni.
Beijing-in a rama a chhal, Taiwan pawh chhiar tel a ni lo va. Taiwan hian Chinese mainland atanga hrang angin an inngai a, danpui hran neiin mipui thlan hruaitu an nei bawk.
November khan khawvelah mihring tluklehdingawn 8 cheng anga chhut a ni a, mi thiamte chuan pun a muang hle tih an sawi a, kum 1950 hnu lama punna a chak loh ber lai a nih thu an sawi.
UNFPA-in survey neia a tirhte hnenah Indians tam ber chuan mihring an tamin nau piang pawh an tam lutuk niin an sawi hlawm a. Chhangtu pathuma pahnih vel dawn ang chuan mihring punna chungchangah hian eibar zawnna chu ngaihtuah hmasak ber a nih thu an sawi hlawm.