Manipur chu Ningani zing lamah thlipui na takin a nuai avangin darkar 12 chuang zet power supply nei lovin an awm.
Thlipui thawk hian electric ban leh in tam tak a chhem thlu a, thlai pawh a tichhe nasa hle.
Ningani zing dar 1:00 bawr vela thlipui thawk avanga tlangram leh phaikuam hmun tam taka power awm lote chu chhun dar 1:00 vel bawrah a pangngaia pek leh theih tan a ni.
Thli hian tlangram khaw pahnih, Morokingkhol leh Senjam khuaa in zawng zawng deuhthaw chung a hawk a ni.
Morokingkhol-a cheng, Bino Devi chuan an in chung chu thlipuiin a lak thu leh a rang thei ang bera siam that leh a nih theih nan sorkar chu che chhuak vat se a duh thu a sawi.
Imphal West district chu thlipui tuar na ber an ni a. Saprou jhuaa electriuc ban leh in tam tak a chhia.
Manipur hian tun nipui thaw meka khua a lum ni ber an tawn hnu lawkah thlipui hi an tuar zui a. District pahnih, chhim lama Myanmar nena inri, Tengnoupal leh khawchhak lama Assam nena inri, Noney-ah chuan Nilaini khan 39.6°C zeta lum a ni.
Phai district, Imphal West-ah pawh 31°C leh Imphal West-ah 35°C a ni bawk.
Mizoram leh Assam ritu, Pherzawl district-ah chuan Ningani khan 25°C chauh a ni thung niin India Meteorological Department (IMD) chuan a tar lang.
Hetih lai hian Chandel district-a Purum Chumbang khua chuan tui an nghei mek ve bawk.
Village chairman Kh Donhra Chothe chuan state sorkar hnenah khaw mite pui thuai turin a ngen tawh.
Chairman hian Nilaini khan an khuain tui an lakna ber, Tumit River endiktute tawiawmin state sorkarin water supply scheme a puitlin lohte an tlawh.
Chanchinbumite hnenah chairman hian Tumit River chu Purum Chumbang khua chauh ni lo, a chhehvela mite tui tlan ber a nih thu a sawi.