Mizoram State Commission for Women (MSCW)-in tun hnaia hmeichhe pahnih chunga pawikhawihna thleng chungchangah dan anga felfai taka thil kalpui a nih theihna turin Director General of Police, Mizoram an beisei thu an sawi.
MSCW chuan nimin khan thuchhuah siamin, April 17, 2023-a Chawlhhmun veng nula pakhat, a thianpa Laldingngheta’n rawng taka sawisaa a kutzungtang pathum tansaka a taksa hmun hrang hrangah na taka a hliam chu pawi an tih thu leh an dem thu an tar lang.
Siaha district, Phura khuaa Nangkhawching-i tualthihna thleng pawh an dem thu MSCW chuan sawiin, Nangkhawching-i thihnaah hian a pasal, Paduwong (M. Sanga) chu mawhphurtu ngei a nih thu police-te hmaah a inpuang niin an tar lang.
MSCW chuan hmeichhe chunga taka kutthlakna leh thihna hial thlenga pawikhawihtuin dan ang taka hremna a hmachhawn ngei theihna turin thubuai hi an vil reng dawn tih an sawi a. Mizoram Police leh court-a roreltute pawhin rang tak leh felfai tak sia rorel a nih theihna tua theihtawp an chhuah an beisei thu an sawi.
MSCW chuan heng pawikhawihna thlengte hian Mizo khawtlang nunah hmeichhe awmnem zawkte chunga hleilenna thleng thin chu tihtawp a nih theihna turin chhungkua, khawtlang leh ram ang pawha mitinte tanrual tulzia hriattir se an duh thu an sawi a. “Kohhran, khawtlang leh chhungkua theuhah inzirtirna uar zawka kan neih a tul takmeuh a, chutiang ti tur chuan MSCW chuan sorkar leh tlawmngai pawl hrang hrangte bakah chhungkaw tinte a beisei tlat a ni,” an ti bawk.