Inter Milan in an hmelma AC Milan nen UEFA Champions League semi-final ah Milan derby-ah inhmachhawn turin an dinhmun an tichiang a. Benfica lakah an mamawh result neiin Nilaini zanah 5-3 aggregate in an chak.
San Siro a inkhelah hian Inter Milan in first leg-ah 2-0 a hnehna chang tawh niin bul an tan a. Benfica nen inkhel hmuhnawmah Portuguese club in beiseina nei chungin an khingpuite an hmachhawn. A tawpah erawh 3-3 in team pahnihte an inhnehtawk.
Nerazzurri an tling
Inter Milan in Champions League semi-final an khelh hnuhnun ber chu kum 2010-ah daih a ni a. Jose Mourinho hnuaiah niin hemi tum hian an champion.
Kuminah league season-ah hmahruaitu Napoli um mar thei lo mahse Europe a tlarhnung nghet ber pawl an ni. Benfica lakah erawh a danglam deuh.
Minute 14-naah midfielder Nicolo Barella chuan goal mawi khungin Inter hmahruaina a belhchhah a. Fredrik Aursnes chuan halftime hma in Benfica beiseina tinungin goal a khung.
Second half-ah Lautaro Martinez leh substitute Joaquin Correa ten Inter tan khung ve lehin an fal viau a, mahse Antonio Silva leh Petar Musa ten Benfica tan an sut zo.
Inter coach Simone Inzaghi chuan, “Coppa Italia leh UCL semi-final kan thlen avangin ka player-te fak tur an ni. Final luh inchuh ngei hi kan team hian kan phu.” tiin a team a fak.