India chu kartawp atang hian khawvela mihring cheng tamna ber niin China a khum dawn niin United Nations chuan a sawi.
India-a mihring cheng hi April thla tawpah hian 1,42,57,75,850 an ni tawh dawn niin data tharah tar lan a ni.
Kar tir lamah khan UN hnuaia awm pawl pakhat chuan India hian mihring cheng tam lamah China chu kumin kum laihawlah a khum dawn tih a lo sawi tawh bawk.
Asian ram hnihte hi kum 70 chuang zet chu khawvela mihring cheng hmun thuma thena hmun khat chuang chenna ram a lo ni tawh a ni.
UN hnuaia Department of Economic & Social Affairs (DESA) chuan, “China hian rei tak khawvela mihring tam berna ram a lo nih tawh chu a hloh ve dawn ta a ni,” tiin thu an chhuahah an tar lang.
“Rinlawk dan leh mihring pun dan atanga thlirin India-in China a khum hun tur chiah hi sawi lawk a har deuh va, dik tawk tura rin dan leh thlir lawkna a ni,” a ti.
UN Population Fund chuan kar hmasa khan India-ah hian kumin kum chanveah China aiin mihring maktaduai 2.9 chuangin an tam zawk dawn niin a sawi tawh.
China-ah hian nau piang thar hi tun hnai kum eng emaw zat chhung chu a hniam hle a, kum 1961 hnua a vawi khat nan mihring cheng pawh a tlem zawngin a kal.
Tun kum zabi a tawp hma hian China-a mihring awm zat hi tluklehdingawn khat hnuaiah a tla dawn niin DESA chuan a sawi bawk.
“Hetih lai hian India-a mihring cheng erawh kum eng emaw zat chhung a pung zawng zelin a kal rih dawn,” an ti ve thung.
Mihring cheng tamna ram pahnihah hian nau piang thar erawh an hniam hret hret zel ve ve a. India-ah hian kum 1950-a nu pakhatin nau 5.7 zel hring ang ni thin kha tunah chuan 2.2 chauh a ni tawh.
November khan khawvel pumah mihring tluklehdingawn 8 an tling a; mahse, mi thiamte chuan punna hi tun hma angin a chak tawh lo va, kum 1950 hnua punna a chak loh ber lai niin an sawi.