Bollywood superstar Salman Khan hian thla tam vak lo liam ta atang khan Lawrence Bishnoi gang ho hnen atangin thaha vauna vawi hnih a dawng ta a. Hei vang hian Mumbai police-in Y+ categroy vehimna khauh tak mai an pe ta hial a, bulletproof SUV a lei bawk.
Tunhnaia interivew-ah actor lar hian thaha vauna a dawn hnu-a a nun dan danglam chho ta leh a khawvel zim zual zel dan a sawichhuak a, ngaia neih a harsat thu a tarlang tel bawk.
India TV channel show ‘Aap Ki Adalat’ -ah Salman chuan, “Security awm loh ai thlawt chuan Security awm chu a tha zawk a lawm. Ni e, security a awm ngei mai. Tunah chuan kawngpuia thirsakawr mahnia khalh te a theih tawh lova, khawiah pawh kal dawn ila, mahni mai chuan a rem tawh lo.
“Chu zawng zawng ai chuan, traffic-jam ah te hian security a tam tak em vangin midangte tan harsatna namen lo ka thlen hi a ni a, min han en hlawm a. Tihngaihna a awm si lo a ni. Ka fan te ka khawngaih em em a, security awmnaah pawh security vanga harsatna hi a thleng thin bawk si a ni,” a ti.
Sawi chhunzawmin, “Min hrilh dan leh awmdan tur ang zelin engkim tih vek a ngai tawh a, kawng tinrengin ka fimkhur viau mai a ni. Full security hmangin khawiah pawh kal a ngai tawh a, chutih rualin, engpawh ti mah ila, thil thleng tur chu a thleng dawn tho tho. Pathianin min veng ngei ang.
“Hei vang hian zalen takin ka chhuak vak ang a, ka duhna hmunah ka thei zel ang, tih lam a ni lo. Hmun tinah min vengtu an awm a, a chang phei chuan heng vangte hian hlauhna ka khat a, tunlai phei hi chu hlauhthawnnaa khah chang hi ka ngah thin khawp mai,” a ti bawk.