India hmar lama boruak him lo put avangin mi 11 vel an thi.
Punjab-a lawngchawlhna khawpui, Ludhiana-a thil thlenga thi zingah hian hmeichhia leh naupang pawh an tel a. An chenna inah nikhawhrelova awm eng emaw zat an awm bawk.
Heng laia chengte hian thawk lama harsatna an neih hnuah an zavaia thiar chhuah niin a hmun pawh khar nghal a ni a. Damdawi inah mi pali enkawl mek an ni.
Eng thil ber nge put tih hriat a ni rih lo va. Thuneitu sang pakhat chuan leia kua siamchawp (manhole) atang a nih theih thu a sawi.
Ludhiana Deputy Commissioner Surabhi Malik chuan, “Manhole hrang hrang atangin sample kan la khawm mek a. A lan danah chuan a chhunga methane (boruakalhthei chi khat) leh bawlhlo (chemical) eng emaw inbelhbawma boruak tha lo insiam ta a awm a ni mai thei,” tiin a sawi niin PTI news agency chuan a tar lang.
Bialtu MLA Rajinder Pal Kaur Chhina chuan bawnghnute zawrhna hmun bul velah he thil hi a thleng niin a sawi a. “Zinga bawnghnute lei tura kalte chu a pawnah hian nikhawhrelovin an tlu zui ta thin a ni,” tiin Reuters news agency hnenah a sawi.
Ludhiana khawpuia Giaspura vengah hian National Disaster Response Force tirh luh nghal an ni a. A bul hnaiah hian factory a awm nual bawk.
India-ah hian thil siam chhuahna hmun atanga boruak put hi a lo thleng fo tawh thin.
Kum thum liam taah khan Andhra Pradesh-a Visakhapatnam khawpuia chemical plant atanga put hip luttu mi 12 vel an lo thi tawh.
Kum 1984-a Madhya Pradesh-a pesticide plant-a chemical put avangin mi sang chuang an lo thi tawh a, he thil phei hi chu khawvel huapa industrial disaster rapthlak ber ni hiala sawi a ni.