Texas, United States-a pa pakhat chuan silai kah a zir thawm sawiseltu a thenawma cheng mi panga lai a kap hlum niin police-in an sawi.
A kah hlumte hi Honduras mite vek niin naupang kum riat mi pawh a tel.
Inkahna hi an ram sanaa Zirtawpni zan (India-a Inrinni chawhma)-a Houston hmar lama khaw tereuh te, Cleveland, San Jacinto County-a thleng a ni.
Sheriff Greg Capers chuan thi zinga pahnih chu hmeichhia an ni a, chhuatah naupang dam chhuak pahnih chungah an lo let niin a sawi.
“An naute hi chhan hram an tum niin a lang,” tiin Sheriff Capers chuan tual chhung station KTRK a hrilh a. Thite hi an zavaiin an nghawng chung lama kah vek an ni a, ‘tihhlum tumna chuang tak, an lu tak tuma kahna vek’ niin a sawi.
A kaptu hi Mexican nia rin niin kum 38 mi, Francisco Oropez a ni a. A hmanrua nen a la tlan bo rih mek a. Mi panga thattua puh a ni.
Police chuan uisathiam leh drone nen an zawng zui mek a, a bul lawka ramngaw velah a tawm an ring.
Sheriff pisa chuan Zirtawpni zan dar 11:30 (India-a Inrinni chawhma dar 10:00) pelhah kohna an dawn thu an sawi.
Chhuitute chuan an thenawmte hian an naute tihmut an duh avangin Oropez-a zu rui tawh tak chu a silai kah zir chu tawp turin an ngen niin an ring.
Sheriff Capers-a chuan, “Hetia an va tih hian, ‘Ka kawt a ni a, ka inah chuan ka duh duh ka ti thei,’ tiin a lo chhang a ni,” a ti.
An inhnial zawh hian an inah ve ve an let leh a, Oropez-a hian a silaimu thun khatin a pan a, a kap ta niin Sheriff Capers chuan a sawi.
Inkahna inah hian mi 10 an lo awm a, puitling pali thiin naupang kum riat mi erawh damdawi inah a thi a ni.
A kaptu hian AR-15 semi-automatic rifle a hmang nia hriat a ni.
Thenawm lawka cheng, Veronica Pineda-i chuan silai puak thawm hi a hriat thu leh thil thleng pangngai mai a nih a rin thu a sawi a. “Thil pangngai emaw ka ti a, kan vengah hian silai ri hi chu hriat tur a awm reng a. Police kan ko chamchi a, eng vak an lo ti ngai lem lo va. Niminah pawh khan silai ri chu ka hre ngei a; mahse, ni dang ang bawk a nih ka ring a, hetiang thil a thleng ang tih reng ka ring pha lo,” a ti.