Aizawl : CYMA Vice President Lalhmachhuana’n “Kan hriatreng tur chu Mizoram ramri km 772 pawn lama awmte hi survival khel vek an ni a, kan chipuite pawh an awm, India khua leh tui nih khel ngar ngar te pawh an awm” tiin, “heng mi te hian min la luahlan thei” a ti.
Maubawk branch YMA buatsaih YMA kumpuan ‘Ram leh hnam humhalh’ hawnna inkhawm Zirtawpni kalta zana neihah he thu hi CYMA Vice President chuan a sawi a. Mizoram hual veltu, damkhawchhuah tuma bei vek chuan hnathawhna chang an hriat laiin, a ram chhunga cheng te chu kan awm mai mai nia sawiin, “Hna kan thawh ve chhunah lah tawrhchhelna kan tlachham a, anni chuan chhel takin hna an thawk a, hetiang renga kan kal chuan min la luahlan thei tih kan hriat a tha hle a ni,” a ti.
CYMA Vice President chuan Mizo zingah nun lem nei an tam nia sawiin, “a dik em tih pawh ngaihtuah hman lovin hlawk kan tum a, hei hi chiahpuam khan a tilang chiang hle a ni,” a ti a. “Hlawkna kan duh avangin a dik leh dik loh kan ngaihtuah hman lova, hlawkna kan duh av- angin midangin tuar mah- se, pawi kan ti tawh lo” tiin, chu chuan khawtlang nunhona a tichhia a, thlantlaa hnathawh ai chuan dik vak lova sum lakluh duhna a thlen niin a sawi.
Lalhmachhuana chuan “Kan khawtlangah khaw eng zahna a tlem ta lutuk a, Biak In chhungah erawh chuan kan la zah viau a, khawlai hmun hrang hrangah erawh kan zah ta lo, kawng sir leh mi tamna hmuna lo inchiu duh tawk kan tam ta hle mai, inenfiaha siamthat ngai kan la nei ngah hle a ni” a ti a,. “Thil diklo nia kan hriatte kan la tlangaupui hram hram avangte hian kan hnam hi a la tlu lo mai mai a ni,” tiin “Hnathawh thuamhnaw inbela thlan tlaa hlawh hmuh ai chuan smart taka mibum ching kan ngaisang a, hengte hi kan sim a hun tawh hle a ni, Mizote chu hnam thuawih leh hruai nuam kan ni a, system tha tak a awm chuan kan zui hreh lova, system tha kan duan thiama, chu chu kan ngaihtuah chhuah a ngai a ni,” a ti bawk.