Tunhnaiah tuia chesuala nunna chan an awm leh thin avangin Aizawl Bawrhsap-in mipui hnena thurawn a tichhuak a. Lui kal tur reng rengin tui thiam hruai tel thin tur te, tui thiam lo chu tui cheng lo tur te, lui kalna tur hrechiang hmasaa, a thuk dan leh chenna atana a him tawk em tih te hre chiang hmasa thin turin mipuite a chah.
Aizawl Bawrhsap chuan luia kal zat hre chiang ngei tur te, an kan kim em tih inchhiar thin tur te, tuia lan theihna tur life jacket emaw keng thin tur te-in mipuite a chah a. Tui tla an awmin, chiai mai lova, chhanchhuah hna thawh dan tur rilru fima ngaihtuah thei awm hram hram tur a pawimawh thu a sawi.
Tui tla an awmin tui hleuh thiam lo chu zuang lut ve mai lova a rang lama tanpuitu tur zawng hmasa zawk thin tur leh vau kamah mau tlawn emaw a awm remchang a nih chuan mau tlawn hmanga tui tla chu pawh chhuah dan tur ngaihtuah thin tur tein Bawrhsap chuan mipuite chu a chah a. Suar dai kai a ngaihin a khauh lai khera daikai lova, a thuk lo lai leh tui khauhlo lai zawng hram hram tur te, ruih nei chuang emaw, harhfim lova tui chen/tui a lut lo tur te, tui khauhna laia tui cheng lo tur tein mipui a chah.
Luia kal dawnin khawchin ngaichang hmasa thin turin Bawrhsap chuan mipuite chu a chah a. Saberekakhuangkaih thleng thei lakah fimkhur tur te, Balu laa eizawng te pawh hmun khat ami thuk deuha la lo tur tein a chah a. Lui kala harsatna tawh palh pawha midang hriattir a awmsam na turin phone signal thatna hmuna kal hram hram tur te in mipui chu a chah bawk.
Tuia chesual an awmin a bul hnai veng/khuaa tui thiam te a rang lama hriattir thin tur Aizawl Bawrhsap chuan mipui a chah a. Emergency response support system (ERSS) toll free number : 112 pawh biak pawh theih reng a nih thu leh District disaster management authority-in darkar 24 chhung District emergency operational centre toll free number: 1077 chu chhiatna thleng report-na tura a buatsaih thu a sawi bawk ani.