Health Minister Dr R Lalthangliana’n Mizoram state health care scheme hnuaia damlo inenkawlna bill ba te chu kumin September-ah chuan pek tlak vek theih an inbeisei thu a sawi.
Civil Hospital, Aizawl-in MJA member te tana a thlawna inentirna an buatsaih a hawnnaah he thu hi vawiin khan Health Minister chuan a sawi a. Asian Development Bank atanga healthcare atana sum an puk tur Rs. vbc 1,000 chu kumin July emaw August-ah emaw chuan hmuh an inbeisei thu sawiin, “Beisei anga thil a kal chuan September thlaah chuan healthcare bill tang mek te chu pek tlak vek kan tum,” a ti.
Health Minister chuan healthcare atan SEDP atangin Rs. vbc 50 dah a nih thu leh healthcare enkawlna turin Finance atangin Rs. vbc 10 hmuh tur a awm bawk nia sawiin, heng sum te hi Finance department-in tunkar emaw karleh lamah emaw chuan an pek chhuah theih an beisei thu a sawi bawk.
MJA member te puala a thlawna inentirna hawnna Doctors’ Seminar hall-a neihah hian Health & family welfare board Vice Chairman Dr. ZR Thiamsanga leh MJA President C Lalrambuatsaiha te pawhin thu an sawi a ni.
Vawiin vek khan Helath Minister Dr R Lalthangliana chuan ZMC, Falkawn atanga MBBS zirchhuak mi 68 te leh foreign atanga zirchhuak mi 6, ZMC-a internship ti tan tur te puala internship orientation programme pawh a hmanpui a. ZMC-a khum 145 vel awm thin chu khum 432 a awm tak thu leh khum 500 a awm theih thuai a beiseiawm thu a sawi.
Health Minister chuan ICU-a khum 13 awm thin pawh khum 50 chuang a awm tak thu sawiin, mi 60 awm theihna tur Intern hostel pawh peihfel thuai a nih tur thu sawiin, Rs. vbc 10 ve ve senna tur ZMC Boys & Girls hostel sak mek a nih thu te, Cabin 52 hawn mai theih a nih tawh thu te, Cardiology department tihchangtlun nan Indian Council of Medical Research-in Rs. vbc 1.02 an rawn pek thu te leh hmalakna dang te a sawi bawk.
ZMC-a internship ti tur te hian tun thla ni 3 thleng orientation programme hi an nei ang a, nakum April ni 30-ah internship chu an zo ang.