Barcelona defender tawnhriat nei hnem tawh Jordi Alba chuan substitute bench atanga dah luh a nih hnuah an chakna goal a khung a. 1-0 a Osasuna hnehin Blaugrana in an La Liga title vawi 27-na lak an hnaih tawh.
Camp Nou a inkhelah hian Barcelona in player 10 a inkhel zo Osasuna lakah hnehna an chang hram a ni ber a, nimahsela match 33 khelh tawh atangin point 14 a hma an hruai avangin an tan vawikhat tlawm loh bak a ngai tawh lo.
Osasuna defender Jorge Herrando chu minute 27-naah hnawhchhuah a ni a. Barca in goal hlauhawm siam hnem hle mahse tlem zawk an ni chungin Osasuna in an lo dang thei viau.
Minute 85-naah Robert Lewandowski cross chu Frenkie de Jong-a’n Alba tan thai remin ani in a ke veilamin a pet goal chiang hle.
Barca coach Xavi Hernandez chuan, “Kan tan result pawimawh a ni a, goal khung tura kan beih nasat a ngaih em avangin result hlu tak a ni.” a ti.
Pahnihna a awm Real Madrid chu season thar a Champions League khelh ngei tum Real Sociedad in 2-0 in an hneh ve thung.
La Real tan hian Takefusa Kubo leh Ander Barrenetxea ten goal an khung a. Second half-ah Real defender Dani Carvajal chu hnawhchhuah a ni bawk.