Premier League-ah Arsenal in ngawi rengin an tha an thlah dawn lo tih an lantir. Thawm ring tak neiin table chung berah an chho leh rih a, Chelsea lakah goal thum an khung.
Gunners hi Thawhlehni zana an chak hma hian league match vawi li-ah chak hmel hmu tawh lo an ni a. Anmahni umtu champion lai Manchester City in an lehpel phah.
Thawm a ring e
Manchester City in London club dang Fulham hnehin an pelh hnuah Arsenal ngawih reng an tum lo. London club tho, season hmang chhe tak Chelsea chu Emirates Stadium-ah an mikhual a. Minute 34 chhungin goal thum an khung.
Gunners tan captain Martin Odegaard chuan hma hruai tha hle in minute 18-naah Granit Xhaka ball pek chu goal-ah a khung.
Minute 31-naah Arsenal in goal ngai an khung. Xhaka bawkin veilam atang ball a pet lut a, Norwegian midfielder Odegaard bawkin dawngin goal-ah a khung nawn.
Minute thum hnuah Chelsea tlarhnung an penalty area chhungah an buai a, Gabriel Jesus-a’n remchang la in an goal thumna a khung.
Chelsea hi interim manager Frank Lampard hnuaiah a zawnin vawi ruk an tlawmna a ni a. Second half-ah winger Noni Madueke hmangin goal khat an khung.
An goalkeeper Kepa Arrizabalaga chetthat zan ni lo se goal engemaw zat chhuah belh tur an ni a. Spanish goal veng hian save tha vawi engemaw zat a siam.
“Kan kal zel ang”
An chak hnuah Arsenal manager Mikel Arteta chuan, “Match li kan la nei a, tunah kan sang ber. Kan hma hun erawh kan kut a awm vek a ni tawh lo. Hei vang hian thil kaldan kan ngaihchan ve a ngai. Mahse kan hmabak a chak vek turin kan kal zel ang.” tiin season tawp thleng inthlahdah an tum loh thu a sawi.
Hetihlai hian Chelsea enkawl lailawktu Lampard chuan, “Vawi leh khatah engkim a siam that nghal vek theih loh, mahse rang taka hma kan sawn erawh a pawimawh.”
“Team hmachhawn nuam tak kan ni a, hetiang ni lo tura kan tih tur kan ti lo nasa hle. Player te hi an inpe lo a ni lo, he club tana chetthat hi an duh. Mahse nitin, an theihna sang tak lantir an mamawh tih hi an hriatthiam tel ve a ngai.” tiin a sawi.