Mizorama rorel lai, MNF party hruaitute chu nimin khan Vanapa Hall-ah an in kokhawm a, an party kal dan zel dan tura rawtna an neihte an sawi ho.
Kumin hi MLA inthlanpui neih kum a ni a, politics boruak a hot chhoh viau laiin rorel lai party erawh kumina Lunglei Municipal Council (LMC) inthlan leh VC/LC inthlanah te a chak lo zawkah an tang thung a. Hemi avang hian MNF party hruaitute hi an thukhawm fo a, nimin pawh khan MNF party-a frontal hrang hrang hruaitu te, party puia secretary hnuai lamte chu Vanapa Hall-ah an thukhawm.
The Zozam Times thudawn danin thutkhawm hi an president, Zoramthanga’n a kaihruai a, thu a sawi bawk a, elected OB dangte pawh an tel a. President-in thu a sawi hnu hian party worker-te chuan an party kal dan chungchanga an ngaimawh te, insiam that ngai lai an neih te, MLA inthlanpui lo awm tura an party-in chakna a chan leh ngei theihna tura rawtna an neihte an sawi chhuak a ni.
Party worker thenkhat phei chu an tawng na hle nia thudawn a ni a, an hruaitute pawh insiam that an ngaihna laiah chuan insiam tha hreh lo turte pawhin an ngen a ni.
He thutkhawm hi ualau taka kalpui a ni lo a, thutkhawma tel tura nihna neite chu an tel kim hle nia thudawn a ni.