Aizawl : Home Minister Lalchamliana’n nimin khan a bial chhung khua Keituma Martarte hriatrengna Lung phun leh Village Council House (Panchayat Bhavan) a hawng a, Martar chhungte laka hma an lak chak tawk lohnaah hriathiam a dil.
Martar thlan leh VC house hawnna puala vantlang inkhawm hi Aided Middle School-ah neih ni a, Home Minister chuan thu sawiin, sorkarin Martarte a ngaihpawimawh hle a, MNF in sorkarna an chan leh tirh phat ah Martarte leh an chhungkuate ngaihtuahtu tur bik Committee thunei tak an din nghal tih a sawi.
Hetihlai hian Covid-19 leng avangin harsatna an tawk a, state sorkarin a beisei ang sum leh pai a hmuh theih loh tak avangin hma an la zui thei rih ta lo a, Martar chhungkua te hriatthiamna an dil bakah lo nghak hram hram turin an ngen tih a sawi.
Minsiter-in a hawn tak Keitum VC House hi cheng nuaih sawm senga sak a ni a, a building bakah hian a chhung cheina leh hmanraw mamawh thenkhatte lei tel nghal a ni a. Martar Lung an phun sakte hi mi pathum Lalchawia, Ralliana leh Lalvena te an ni.