Aizawl : MNF Aizawl West 1 Block-in Capt. Lalhleia hriatrengna lungphun an phun chu MNF Sr. Vice president Tawnluia, Deputy Chief Minister-in nimin khan a hawng a, Block conference a hmanpui nghal.
Tawna chuan Capt Lalhleia chu a huaisenna, a tumruhna leh a finna avangin chawimawi, fak leh zah a phu a, Aizawl West 1 Block hruaitute’n bialtu MLA hovin a tluk hlumna hmun veng Chawlhhmun ngeia lungphun an siam chu a lawmawm a tih thu a sawi a, Mizo hnam chhan nana hrehawm tinreng tuar huam, hnam sipai te chu ngaih hlut thar a ngai tih sawi a sawi bawk.
Chawlhhmun Community Hall-a MNF Aizawl West 1 Block Conference ah hian khuallian Tawna chuan MNF zawm thar mi 333 a lawm lut a, Aizawl West 1 bialtu MLA Zothantluanga’n thu a sawi bawk.
Block conference-a tel MNF party mite chuan resolution siamin, Chief Minister Zoramthanga kaihhruaina avanga hmasawnna hmel thar Mizoramin a hmu zel chu lawmawm an tih thute, hetianga hruaitu rintlak hmathlir nei tha hruaitu an nei chu an chhuan thu leh a kaihhruaina hnuaiah kum 2023 General Election lo awm turah MNF partyin sawrkarna an chan leh ngei an beisei tih leh Aizawl West 1 Bialtu MLA Pu Zothantluanga’n a bial a enkawl dan chu lawmawm an tih thute an sawi bawk.