Rajouri district, Jammu & Kashmir-a mi firfiakte nen an inbeihnaah Indian sipai panga an thi a, hliam tuar an awm nual bawk tih thuneituten Zirtawpni khan an sawi.
Defence thupuangtu chuan sipaite hian tun hnaia sipaite beia panga thattu mi firfiakte lakah beihpui an thlak tih a sawi.
Thupuangtu chuan beihpui thlaknaah hian ‘mi firfiakte hian lo chhan let nan thil an tipuak’ niin a sawi a. A hmunah sipai pahnih thiin paliin hliam tuarin Command Hospital, Udhampur-ah lak nghal an ni a. An zinga pathum chu an thi zui zui leh ta a ni.
Beihpui hi Kesri Hill-a thlak a ni a. Sipaite hian a hmain heng lai vela pukah mi firfiak tawm an awm tih thu an dawng a, an bawhzui ta a ni.
Sipaite chuan heng mi firfiakte hi April 20-a Bhata Dhurian, Poonch district-a sipai truck lambuntute kha niin an sawi a. He lambunnaah hian sipai panga an thi a, sipai thite ralthuam hi laksakin an tlanchhe zui a ni.
“Indian Army chuan Tota Gali-a truck lambuntute hi chhui zuiin an thu hriat bawhzuiin beihpui an thlak a ni,” tiin army thupuangtu chuan a sawi.
Beihpui thlaknaa tel tur hian hmun dang atangin sipai dang pawh koh luh an ni.
Sipaite hian mi firfiakte hi an hual chepin an tang tawh niin an sawi a, an zingah ‘hliam tuar pawh an awm ngei’ nia an hriat thu an sawi.
October, 2021 khan Rajouri-Poonch region-ah tun tum ang deuh bawk hian sipaite hi beihpui an thlaknaah an chesual a, mi firfiakten panga lai an lo that tawh.
Hemi tum pawh hian sipaite hian mi firfiakten sipai an lambuna pali an thah chhui zuia beihpui an thlakna tho a ni.
Hemi tum hian thla khat zet mi firfiakte hi chhui zui ni mah se tumah thah an awm zui ta lo.
Thla hmasaa Bhata Durian-a sipai lambun an nih hnuah khan a chhehvel hi hi kharin a titute zawn hna thawh mek zel a la ni a, tun thleng chuan chhui chhuah chiah erawh a la awm lo a ni.
Sipaite chuan beihpui an thlak dan kimchang hi an la puang lo va, an la kalpui mek zel tih an sawi.