- Mahmuaka Chhakchhuak
Berampu tha Lal Isua chanchin sawi kan tum rih lo a, vawiina kan hnena awm leh kan biak a, kan hmuh theih renga awm Sakhaw rawngbawltu mi pakhat chanchin hi sawi kan tum zawk a ni. Amaherawhchu mimal chanchin sawi hi thil nuam a ni hauh lo a, a chhe lam emaw a tha lam pawh nisela anmahni tan nawm lohna tur chhan hi thil tam tak a awm theiin a rinawm. Chuvangin a tawk thiam pawh a har dawn hlein a hriat a, kan tana tangkai theih tur zawngin sawi han tum ila a tha ang e.
Pathianin a kohhrante enkawl tura a ruat Berampu chanchin ngaihnawm tak tak sawi tur tam tak kan hre hlwmin a rinawm a, Lal Isua ngei pawhin ’Kei hi Berampu tha ka ni a, Berampu tha chuan a Beramte tan nun a hlan thin’ tiin alo sawi tawh a. Berampu leh Beramte inkar thu pawh hi ngaihnawm taka sawi tur a awm bawk. Zirtirte ngei pawh kohhran tana an rawngbawlna chanchin ngaihnawm tak tak a awm bawk a, anni hnu lama kohhran hruaitu hmasate chanchin pawh sawi tur tam tak a awm bawk ang. Vawiin hun thlenga Berampu tha chanchin sawi tur la awm leh amahni ngei pawh biak theih tura kan zinga la awm chanchin hi midang tana bengvarthlak tur tam tak a awm mai bakah midang tana hlawkna leh tangkaina awm theia rinna nei chungin han thai lang ila, kan uar lutuk lo turah ngai bawk ila a tha ang e.
Amah chu Rev. MS. Dawngliana niin Presbyterian kohhran rawngbawltu a ni a, rawngbawltu la upa lo tak niin tunah hian Delhi-ah an chhungkuain an awm mek a. Kan inbia kan inbia a, mi fel tak a nih bawk avangin ka inngaina thuai a. Tichuan, Delhiah Global Peace Leadership Conference neiin hun kan zuk hmang a, kan kal hma atangin amah chu ka bia a, inhmuh ngei ka duh thu sawiin amah ngei pawh chuan inhmuh a chak thu alo sawi bawk a. GPLC lama kan hun hman a zawh takah chuan ka thlenin lamah amah zawk chu rawn lengin kan inkawm thei ta hlauh mai a, a zahawm zawk kher mai. Kan vawikhat inhmuhna mah nisela thinlung takin kan inkawm nghal bawrh bawrh a, a chanchin ngaihnawm tak tak min hrilh a, chuta tang chuan Sakhaw rawngbawltu mai ni loa Berampu tha a nihna chu keiah ngei pawh chuan kan hriat phah a ni.
CANCER NGAMTU A NI; Tumkhat chu an chhungkuain Car thar lei tumin an chhungkua an inbuatsaih a, Loan hmanga lei tumin Bank lamah Loan lakna form pawh la vek tawh nain form chu a fill up mai duh lo a, chutianga an awm mek lai chuan a mitvun vei lam vun chhung lamah hian bawk a awm avangin a inentir a, uluk taka an han en chuan Cancer alo ni a, Car thar neih ngei tum chuan Cancer an nei zawk ta tihna a nih chu. Kum khatah vawi thum lai zai a tawk a, amah chauh niloin chhungkua an buai a, kohhran hruaitute ngei pawhin khawpui lama awm turin tawngkam an nei nghe nghe a, nimahsela a ni chuan a awmna ngai Phullena awm a, a term hman zawh law law chu a thlang a.
Natna khirh, mi tam takin an lo thih phah tawh Cancer natna chuan a thinlung a buan a, buan hneh ngei pawh tumin a buan viau bawk a, nimahsela a ni chu Pathianah inti chak sauhin amah buantu Cancer chu buan hneh zawk ngei a tum a, Pathian rawngbawltu ka ni a, a ni chuan tul a tih chuan min hneh tir ngei ang tih thinlung a nei tlat a, tun hun tak hi a ni lawm ni Pathian hre tu kan nihna tur chu tiin amah chu a inti paukhauh lui a, Doctor thiamna leh tawngtaina tam tak a dawnte avang chuan damna a lo chang ta a.
ANXIETY & PANIC ATTACK HNEHTU A NI; Rilru lam nautna (Anxiety, Panic Attack, etc) hi mi tam takin kan buai phah ta. Natna tihdam har tak niin Doctor te ngei pawhin an buaipui nasat thin thu kan hre foin a rinawm. Dr. Debra Fulghum Bruce chuan hetianga rilru lam natna (Depression) hi alo awm chhan dik tak hi tumahin kan hre lo a, chhan tam tak vangin alo awm thei a ni tiin a sawi. A lanchhuah dan hi chi hrang hrang a awm thei ang a, Rilru thlaphanna, rilrua a chhe lam thleng tura ngaihtuahna neih hi a langsar ber a ni kan ti thei ang. Thi tura inngaih tlatnate leh insum thei hauh loa tah hawm hawmna te hi a thleng fo thin a, tuna kan sawi lai mek sakhaw puithiam ngei pawh hian thi mai turin vawi tam tak ngaihtuahna a nei tawh thin. Rawngbawltu niin Pastor nimahsela chu hlauhthawnna chuan a buan nasa em em a, chhungkua kokhawmin tawngtai rualnate an han nei leh ngawt thin bawk a, midang tana rawngbawl hleithei loin amah ngei chu rawngbawl sak zawk ngaiin a awm fo thin a ni.
Tukverh khar phui vek chhungah a awm thei lo a, thlasik khawvawtah pawh tukverh hawn hram hram chu Pastor ber chuan a duh tlat zel a, lungkham nasat luat avangin chauh chang hi vawi tam tak a nei bawk thin. Hlauhawm awm miah loah hlauh tur a zawng a, thih mai hlauhna leh taksaah natna khirh tak neia inhriat tlatna lian tak a nei reng bawk thin. Endoscope, Ultrasound, ECG leh Echo hmangte pawhin a kawchhung lam vawi tam an en tawh thinin engmah hmu lo mahsela amah ber chuan khawl chu ringhlel zelin natna nei tlata inhriatna lian tak a nei reng thin. Chutianga a buai em em lai chuan Aizawlah kalin a chhungte hian ‘Darkar sawm la dam tur’ tih lehkhabu hi chhiar turin an lo rawn a, chawngheiin vawi tam a tawngtai tawh bawk avang chuan leh a lehkhabu chhiar chuan a hlauhna leh natna zawng zawng ata chu hahdamna a thlen ta a.
Hetiang hian kimchang lo takin Cancer a paltlang dan leh Anxiety a paltlang dan chanchin tawitein kan han tarlang a, tunah chuan chung natna khirh tak atang chuan tihdamin alo awm ta. Pathianin a rawngbawlna pawh mal a sawm a, a awmna hmun apiangah ‘Berampu tha’ a nihna chu mitin hriat turin alo awm ta zel a, a lawmawm takzet a ni. Tunah chuan Cancer natna leh Anxiety hi hneh theih a nih dan hmun tinah a sawi ta fo a, natna khirh tak hian mihring alo tihchauh theih dan leh chumi ata talchhuahna tur kawng chu fiah taka puang thinin kohhran hote tan malsawmna tam tak thlentu alo ni ta a. Natna thlentu chu sual leh tlukna rah a ni tih pawh fiah takin alo hriat phah a, chu chu midang hnena puang zelin Pathiana intihchak dan tur kawng kawhhmuhtu alo ni ta zel bawk a. Pathianin a hruainaah lawmna tam tak neiin a theihtawpa Pathian leh kohhrante tana rawngbawl turin ke a pen mek zel a ni.
Sakhaw rawngbawltu tana mi tam takin mawi loa kan hriat leh inhmeh lo deuha kan hriat- Social media hi a ni chuan tangkai taka hmangin rawngbawlna pawimawh takah a hmang a. Lockdown lai khan Youtube Channel siamin chumi hmang chuan Pathian rawngbawlna a nei thin. Crusade nei tur leh Camping Speaker tura sawmna a dawng awl lo a, amah kaltlangin Pathianin a ropuina a puang chhuak mek zel a ni. Sual kawng zawh mekte vei em em tu a ni a, chhanchhuah duhna lian tak nei mi a ni. Kum 2022-ah ngei pawh khan a piancham lawmna atan ruihtheihthil timite khawmin chawhlui alo buatsaih tawh nghe nghe a ni. A nun paltlang tawhna hian midang tana nasa zawka rawngbawl turin a inbuatsaih tirin CoviD lai ngei pawh khan inkhawm theih ni lo mahsela a ni hi chuan Kohhran mite tan chawl loin rawngbawlna neiin a theih dan danin home crusade a neihpui fo thin. Amah bawk hi alawm tunhma deuha Vanglaini Chanchinbua The Revival Evangelical Weekly enkawltu kha.