Iraq khawpui, Baghdad lailia sumdawnna hmuna nimina thihchilh bomb pahnih tihpuahah mi 20 vel an thi a, mi dang 40 velin hliam an tuar bawk.
Thihchilh bomb paitute hi Tayaran Square-a thawmhnaw lam zawrhnaah venhim hna thawktuten an umzui mek laiin an thil pai an tipuak.
Baghdad khawpuia thihchilh bomb tihpuah hnuhnung ber chu January, 2021 daih tawh kha niin hemi hmun vekah hian a ni a, mi 35 an thi.
Nimina thil thleng hi a titua inchhal eng pawl mah an la awm lo va; mahse, thuneitute chuan Islamic State firfiak tih niin an ngai.
Iraqi sorkar hian he firfiak pawl lakah hian kum 2017 khan hnehna puang tawh mah se tun thlengin hnuhma duhawm lo tak tak an la nei reng.
IS hi lian tham lem lovin Iraq-ah hian an la che reng a, a bikin thingtlang lam leh venhim hna thawktute an bitum nasa zual.
Iraqi sipai thupuangtu, Yehia Rasool chuan Bab Sharqi vengah, venhim hna thawktuten an umzui mek laiin thihchilh bomb paituten an bomb pai an tipuak tih a sawi.
Bomb paitute hian hun rei tak coronavirus hripui leng avanga inkhuahkhirhna avanga khar tawh, Tayaran Square-a second-hand thawmhnaw zawrhna dawr, tun hnaia hawn leh avanga miin an bawr tam vanglai chu an chuh nia hriat a ni.