Aizawl : Sorkar laipui hotute dawra New Delhi-a cham mek Higher & Technical Education Minister Dr R Lalthangliana chuan Inspector General of Forest Ramesh Pandey a kawm a, National Institute of Technology (NIT), Mizoram dinna tur hmunhma Lengpui a mi chungchangah a sawi pui hnuah forest clearance a tihfel sak.
H&TE Minister hian zirtawpni khan Forest Ministry tlawhin Ramesh Pandey a kawm a, Lengpuia NIT dinna tur hmun hma hun rei tak chhung forest clearance hmuh loh vanga hmalak theih loh chungchang a sawipui a, khunkhan taka an sawidun hnuah Ramesh Pandey hian forest clearance a lo tihfel sak a ni.
Hemi chungchangah Mizoram sorkar sum chawi tur awm loin, sum chawi ngai zawng zawng chu Ministry of HRD-in an chawi vek dawn a. Hei bakah hian Dr R. Lalthangliana chuan Mizorama project lian tak tak kalpui mekah forest clearance ngai a awm thin avanga hmasawnna hnathawh sukuk a awm thin chu pawi a tih thu thlenin, eng emaw chen chu ngaihnathiamna nen lo en thin turin an ngen bawk.
Zirtawpni tlai vek khan Dr R Lalthangliana hian Border Roads Organization Director General Rajeev Chaudhary kawm bawkin, Lunglei leh Lawngtlai district inkalpawhna atana pawimawh Tuipui ‘D’ Darzo kai lei dawh tur chungchang a sawipui a. Rajeev hian clearance an tihfel bakah tender an koh tawh thu lo hrilhin, a khawihtu tur contractor pawh June thla ral hma a thlan fel an inbeisei thu a lo hrilh bawk.
He project hi cheng vaibelchhe 90 hu niin July thla chuan hna tan theih beisei a ni. Heng bakah hian minister hian North Vanlaiphai – Thingsai – Pang khua inkalpawhna BRO hovin an laih mek chu rang taka thawh zawh sak turin a ngen a ni.
Health Minister Dr R Lalthangliana hian Delhi-a a cham chhung hian Niti Aayog member (Health) Dr V.K. Paul, Union Agriculture & Farmers’ Welfare Secretary, National Bamboo Mission enkawltu ni bawk Manoj Ahuja leh Ministry of Health & Family Welfare Joint Secretary (Malaria) Rajiv Manjhi te a kawm bawk a ni.