Aizawl New market-a bawngsa zuar Multipurpose Cooperative Society Limited chuan bawngsa an zawrhte chu dan ang thlapa talh, vety doctor-te endikna paltlang a nih thu an sawi a, tun hnaia Facebook kaltlanga zawrh chhuahte erawh a thianghlim tawk loh an hlau.
New Market-a bawngsa zuarte chuan nimin khan Aizawl Press Club-ah chanchinbumite an kawm a, bawngsa an zawrhte chu an talh hmain vety doctor-ten a him leh him loh an endiksak vek thin a, talh a nih hnuah pawh a kawchhung lama fel tawk lo a awm a nih chuan hralh phalsak an ni ngai lo a, endikna tluantling paltlang, mihring ei atana him chin chauh an zawrh chhuah thin thu an sawi.
Hetihlai hian tun hnaia Facebook kaltlanga man tlawm zawka bawngsa zawrh chhuahte erawh vety doctor-te endikna hnuaia talh ni loa an hriat thu leh heng bawngsate hi a thianghlim tawk em tih chu an zawhna a nih thu an sawi a, mipuiten bawngsa thianghlim lo an ei an hlauh thu an sawi a ni.