Aizawl: Thorang bialtu MLA Zodintluanga Ralte chuan nimin khan a bial chhunga Changpui Branch YMA Golden Jubilee lawmna a hmanpui.
Vanhnuailiana (Vanchaka) Run-a jubilee lawmna inkhawmah thusawiin Zodintluanga Ralte chuan kum 1973-a Changpui Branch YMA din a nih atanga vawiin thlenga mei mit lova golden jubilee hial lawm thei tura YMA lo kaihruaitute chu fakawm a tih thu leh chawimawi tlak an nih thu a sawi a. Tun hnaiah a bial chhung, Rotlang West leh Phairuangkai khuaten an khaw golden jubilee an lo lawm tawh thu sawiin, Changpui Branch YMA-in an lawm leh thei chu bialtu MLA a nihna ang pawhin thinlung taka a lawmpui thu a sawi.
Congress Legislature Party (CLP) Leader Zodintluanga Ralte chuan YMA hi awm lo se Mizoram awm dan tur a ngaihtuah fo thin thu a sawi a. “YMA chu mi mangang leh harsa zawkte tanpuitu an ni a. Kohhran leh political party a thliar hrang ve lo a, thlei bik nei ve lo a. Mi tute tan pawh YMA hi a awm reng a ni,” a ti a; Changpui thalaite chu zirna uara tan la tura a fuih bakah ruihhlo laka fihlim turin a fuih bawk.
Changpui Branch YMA hian golden jubilee an lawm rual hian an khawchhuakte haw runpui an buatsaih bawk a, Jubilee hi kawng hrang hrang a an lo lawm tawh bakah nakkum May 24 zan thleng a lawmna programme hi an hmang chhunzawm dawn a ni.
Changpui khua hi Lunglei district-a awm niin in 98 vel awmah mi cheng 494 vel an awm a, Lunglei atanga km 86-a hla a awm a ni a. Village Council member pathum awmna khua niin YMA member 180 vel an awm mek a. Changpui Branch YMA hian vawiin thleng hian an khuaa chhiat tawk chhungte tan ni khat hna an la thawhsak ziah a ni.