Khawvel ram tinin hmasawnna leh nun changkang hi kan duh vek a. Chutihrualin keini ram kilkhawr ber pawhin khawvel changkang leh hmasawnna chu kan hmu ve reng tho bawk. Mi ram hmasawnna chuan rual min awhtir a. Engvanga hmasawn ve hlei thei lo nge kan ni tih chu mipui thinlunga zawhna lian tak, englai pawha riak reng a lo ni ta a ni.
Kan hmasawn lohna kan chhui a. Sawrkar department ah te sawrkar hmalakna chu kan chhui a. Fel lo awm zelin kan hmu a. Officers te ah kan chhui a. A tawpah a kaikuang a lo lang thin. Kan politician te ah kan chhui lut a. Man fak hleih theih si lohin kan minister te chu kan ringhlel zo ta a. Politician te chu kan hmu bawlhhlawh ta em em mai a. Politician te leh beaurocrats te hnung inhiah tawn sakna chu a awm ngei a. Beaurocrats te chu politician hnuaia awm an ni si.
Kan politician te hi an tha lo vek bik lo. Tha lo erawh an tam. Heng zawng zawng hi tih tawp a, thianghlim zawka kalpui theih a ni. Eirukna khur hi tu berin nge lai thin tih hi chhui chhui mah ila a tawpah chuan ram puma mawhphurhna kengtu chief minister chalah a tawp tho tho a. A vaia chingfela kan ram hmasawnna kalkawng tluangpui zawh dik tur chuan chief minister mi dik ka mamawh ta a ni.
Kan ram hruaitute hian chief minister nih hi chu tling an inti viau hlawm a. Mahse, eirukna khurpui titawp tur chuan ama thinlung a dik a ngai a. Eirukna leh dik lohnaah a lo inrawlh tawh thin em tih pawh hi kan ngaihtuah chian a ngai. Dik lo taka sum leh paia lo hmingchhe ve tawh chuan eirukna hi engtikawng mah hian tih reh dan a awm lova. Hun kal tawha sum leh paia miin dik nia an hriatte ngei hi ram enkawla, sum leh pai vawng tur hian kan thlanchhuah thiam a ngai hle.