Tuivawl bialtu MLA Lalchhandama Ralte chuan nimin khan a bial chhunga Sakawrdai leh Khawpuar-a Manipur atanga raltlante a tlawh a, tanpuia chhawmdawl turin Mizoram sorkar a inhawn reng thu a sawi.
Lalchhandama Ralte chuan raltlante a tlawhnaah thu sawiin a bial chhungah hian raltlan 1,200 chuang an awm thu a sawi a. “A tam zawkin an chhungte an bel a, camp-a awm ngai eng emaw zat an awm avangin heng mite tan hian khawsakna tur camp sak a ni a, raltlante camp lian ber chu Sakawrdaiah hian sak a ni,” a ti.
School education minister chuan raltlan naupang sikul lut rual lehkha zir si loten a rilru an tina tih sawiin, “Heng mite hian sikul an luh theih nan sorkarin thuchhuah a siam. Anmahni luh theihna class-ah raltlan naupang, sikul kal duhte chu sorkar sikulah an lut thei a ni,” tiin, sikul lut duh apiangte chu inthlahrung lova lut zel turin a chah.
Minister chuan relief camp chu a nuam thei lo tih sawiin, khawtlang hruaitute nen a tul ang ang an ruahman zel dawn tih a sawi a. Hnathawk thei rualte chuan VC berawn chunga a theih ang anga an mamawh tuak nan hna thawk turin a chah a. Harsatna an neih pawhin sorkar chu an tan a inhawng reng tih a sawi a, Manipur nen state ramriin dang mah se, Mizoram chu an ram a ni tih hria a mikhual rilru pu lo turin a chah bawk.
Lalchhandama Ralte hian raltlante tanpui nan Rs 20,000 a hlan a ni.
He huna Sakawrdai VCP-in a tar lan danin, raltlante tawm hulna tur hi khaw thenawma mite pawhin in pahnih an sa a. Raltlante mamawh lei nan pawl leh kohhranin Rs 87,000 an thawhkhawm tawh a ni.
Sorkar thuchhuahin a tar lan danin Sakawrdai camp-ah hian mi 73 leh Vaitin YMA Hall-ah mi 12 an khawsa mek a. Manipur sorkarin raltlanten an rauhsan an chenna inte chu luahtu an awm loh chuan an chân dawn tih a sawi avangin tam tak chu an let leh a ni.