- MC Lalthianghlima
Kan hriat theuh angin MLA inthlanpui chu, kumin kumtâwp November thlaah hian Pathian zârah kan dam a nih chuan hmachhawn leh turin kan inbuatsaih mêka. Political party hrang hrangte pawh he hun thlîr ran hian an che chho mêk a ni.
Kan state-a rorêl lai Mizo National Front (M.N.F) party chuan, congress party dinhmun chhiat rih zia an hria a. An mahni el pha tur leh an buanpui ber tura an ngaih leh mipuiin sorkarna pêk mai an rilruk, an mahni M.N.F ngei pawhin huphurh en a an en Zoram People’s Movement (Z.P.M) chu an bei na tial tiala. Ni 24. 5. 2023 (Nilai) a Serlui M.N.F joint Block conference Vairengte multipurpose hall-a neih a hmanpuinaah M.N.F party president (Chief Minister ni bawk) Pu Zoramthanga chuan thusawiin, inthlan lo awm turah an party-in candidate-ah buaina an nei lo tih sawiin ‘Z.P.M chuan green signal pêk thuah an nei nual’ a ti a. Mi hrang hrangin an sawm avangin tunah hian an buai phah niin a puh bawk.
M.N.F President hian, an mahni party chhûngkua buaina hmuh kânin party dang chhûngkua chu an nihna bâk bâkin a puh niin a lang. Kum 2018 M.L.A inthlan dawn khan M.N.F party chhûngkua hi candidate chungchang leh thil dang dangah an buai nasa hle a. Candidate nih inring, candidate ni ta si lo thenkhat phei chu an lungawilo nasa khawpa, party atanga chhuah hial duh khawpin an buaia an party hruaitute phei chu lungawilo thlêmin an vaka, chaw (zanriah) hial ei chilhin lungawilote thlem kual kha an hnapui ber pakhat a ni. Khati khawpa an buai chung khân, congress sorkar ninna boruak leh sorkar thar siam duhna kha mipui-ah a thawk na hle a, lungawilo ngah êm êm chung khan M.N.F party chu an sorkar ta tho a nih kha.
Kumina M.L.A inthlanpui kan hmachhawn turah hian M.N.F president chuan, an party-in candidate ah buaina an nei lo tih a sawia, hei hi dâwt a nih loh vêk pawhin, candidate nih inchuh (châk) khawpin an phur tawhlo a ni ang. Chutih rualin, an unit hruaitu thenkhatte chuan tuna an M.L.A thenkhatte hi chu ding tawhlo se tih an nei nual thung.
M.N.F party hian party dang, a bîktakin Z.P.M chhungkuaah candidate chungchanga eng emaw thu inhmuh tâwk lohna thil a lo awm tak tak a nih pawhin, sawi sawi tur an ni lova kum 2018 M.L.A inthlan dawna an party chhûnga buaina an tawh ang êm êm kha Z.P.M chhungkuaah hian a la awm lo, pâwn lam atangin party dang hian sawi buai phêt an tum a ni zawk, candidate chungchangah eng emaw thu inhmuh tawk chiah lohna lo awm ta tehreng pawh ni sela Z.P.M party nghawr nghing tur khawpa buaina a awm lova, chu bakah Mizoram mipuite hian vawiina sorkar kan hrawn mêk hi thlâka Z.P.M hi an aiawha rorêl turin mipui hian sorkar-na pêka, kan ram siamtha-a tundin an duhna hi a takin vote hmanga lan tir an tum nghet tlat a. Kum 2018-a M.N.F chhungkua buai tak chunga mipuiin sorkar-na pêk an tumna boruak âia lian zawk daih khân, mipuite hian Z.P.M hi sorkar-na pêk an tum nghet tlat tawh a ni.
A thuhrimah inthlang ram (Democracy) ah kan awma, inthlan kan hmachhawn fo tawha, M.L.A chu sawi loh V.C leh L.C inthlanah pawh, âwm inti candidate beisei hi political party tin hian kan nei vek, a châng chuan candidate inchuh deuh rap rap châng pawh a awm, hei hi zêp leh phat rual a ni lo, party hrang hrang nihphung a nihna lai a awm, he boruak (candidate nih inchuh) hian sorkar-na leh sorkar lohna ko-ri a tu tehchiamlo, rorêl lai party hi ram mipuiin an nin tawh chuan, candidate nih an inchuh emaw chuhlo emaw , mipui hian an paih tho thova, candidate nih inchuh deuh rap rap pawh ni sela, mipuiin sorkar-na pêk an rilruk party chu an sorkar tir tho tho tih hi tuman kan hai lo.
Mizoram mipui hian, vision leh dream (mumang leh suangtuahna ram khawvêl) a chêng Chief Minister neih reng leh duhthusâm ringawt sawi, a taka tih tak tak tum lemlo sorkar hrawn hi an ning tawha. Mi ram Chief Minister ît ngawih ngawiha awm reng hi an ning tawh hrim hrima. Chuvangin mitin huapzo leh mipui sorkar siam leh kan ram economy a taka chawi kang thei tur an zawnga, chutiang mi chu an hmu tawha, chu ngei chu an âiawha rorêl turin sorkar-na pêk an tuma, kalphung thar hi a taka kalpui an duh tawh a ni.
‘Pathian leh kan ram tân’ tih tawkdarha hmanga sorkarna chan hnua, kan Pathian leh ram hre chang tawh lova ‘Kei leh ka chhûngkaw tân’ tih ang maia kal vel mai mai leh hnam pasaltha (Martar-te) thlân leh an ruhro hmanga campaign fo hi, kan hnam pasaltha (Martarte) thlarau pawh a zahawm lutuk ta e.