Chhattisgarh-a thil danglam tak thlengah sorkar hnathawk pakhat chuan tuikhuaha a phone man to tak a thlauh palh hmuh let leh tumin tui litre nuai 21 zet a paihtir.
Tuikhuaha tui hi ‘hmantlak loh’ niin a sawi a, tawngkaiin Sub Divisional Officer hnen atangin paih kang phalna a hmu bawk niin a sawi a; mahse, district collector-in a nihna hmang sual leh phalna pe theitu tak a dawr loh avangin a hrem (suspend).
Kanker district, Koilibeda block-a food officer Rajesh Vishwas-a hian Kherkatta Dam-a a thiante nen chawlh an hmannaah a smartphone Rs. nuai khat man zet chu feet 15-a thuk tuiah a titla a. A bul vela miten an zawnsak ngial hnuah an hmu lo va, officer hian 30hp diesel pump pahnih hmangin tui theh kang tumin ni thum chhung zet a bei ta a. Tui litre nuai 21 a paih hi thlai chinna hectare 1,500 zeta zau tui pekna daih a ni.
Thawhtanni zan atang khan paih tanin Ningani thleng a ti a. Irrigation & water resource department-in complaint an dawn bawhzuia an kal hnuah a titawp ta chauh a ni.
Hetah pawh hian tui hi feet ruk vela thuk a la ni a. Nipuiah chuan tuikhuah hi feet 10 vela thuk a ni a, ransa tam takin an tlan thin.
Vishwas-a chuan a phone hi a selfie laiin a thlauh palh tih sawiin an department thil pawimawh tam tak a awm avangin hmuh let leh ngei a ngai niin a sawi a. Tui lut thiamten an zawnpui a; mahse, a mawng chu lung a tam em avangin an hmu thei lo niin water resources department hotu chuan a sawi a. Hei hi tui a paih kang chhan a ni ta a ni.
“Pathiannia ka chawlh laiin ka thiante nen inbual turin kan kal a. Ka phone ka thlauh ta a, feet 10-a thuk a ni a, min zawnpui ngial a, kan hmu si lo. Tui chu feet hnih thum vela a kâm chuan an zawn hmuh theih tur thu min hrilh a. SDO biain a bula tui kawngah luantir turin ka ngen a. Ani pawhin feet hnih thum tihphai chu a pawi loh tur thu leh lo neitute pawhin kan paih chu an lo chhawr zawk tur thu min hrilh a. A bul vela chengte nen hian kan paih kang ta a ni,” a ti.
Water resources department hotu pakhat chuan tawngkain feet nga vela thuk thleng paih phalsak a ni a, a aia tam paih a ni tih thuthar lakhawmtute hnenah a sawi.
Phone hi an hmuh leh hnuah pawh ni thum lai tuia inchiah tawh a nih avangin a nung thei tawh chuang lo.
Chhattisgarh chief minister hlui, BJP hruaitu, Raman Singh slammed chuan Bhupesh Baghel-a kaihhruai Congress sorkar chuan a hnuaia thawkte chu mahni thua kaltir mai mai a ching niin a sawi a. “Khaw lum laiin miin water tanker an ring a, chutih laiin sorkar hnathawkin lite nuai 21 lai a paih mai mai si,” a ti.
Post a commentCabinet Minister Amarajeet Bhagat chuan he thil thleng hi a ngai thutak hle tih a sawi a. “Thil awm dan kimchang ka ngaichang mek a, a tul angin action lak a ni ang,” a ti.