Aizawl : MZP Gen. Headquarters leh Chin Baptist Church, Indianapolis, USA te tangkawpin Manipur buaina avanga Mizoram raltlan, Tinghmun, Sakawrdai leh Vaitin-a awm te hnenah Buhfai leh tanpuina sum an pe.
Tinghmun branch YMA kutah Buhfai bag 12 leh Rs. 5,000 bakah ei tur chi hrang hrang an pe a. Sakawrdai relief camp-ah Buhfai bag 15 leh Rs 5,000 bakah ei tur chi hrang hrang pein, Vaitin VC kutah Buhfai bag 3 leh Rs. 2,000 bakah ei tur chi hrang hrang dah bawk.
Tanpuina hi MZP hruaitute a hmunah kalin an hlan a. Raltlan awmna hmun hrang hranga awm te nen inkawmin, MZP President Lalnunmawia Pautu chuan sahimna zawnga Mizoram tlanlut te chu Mizoram kohhran hrang hrang, NGO hrang hrang leh political party hrang hrang ten inlungrual taka an lo dawnsawn thu leh an lo enkawl thu a hrilh a. Mizoram chu Zofate Jerusalem a nih avangin thlamuang taka awm turin a chah.
MZP President chuan Mizoram mipui ten hmangaih taka an enkawlna chu a tha thei ang bera chhanglet turin raltlan te chu a chah a. Mizorama an awm chhungin khua leh tui tha tak ni turin a chah a ni.