Manipur Police commando chuan Pathianni khan darkar riat chuang zet tun hnaia chi leh chi intihbuaina thlenna hmunah beihpui an thlak a, hel pawla mi 40 zet an that nia sawi a ni.
Chief Minister N Biren Singh chuan thuthar lakhawmtute hnenah ‘mi firfiak 40’ kah hlum an nih thu a sawi.
“Firfiakte hian civil mite beih nan M-16 leh AK-47 assault rifle leh sniper silai an hmang a. Khuaah lutin in an hal a. Sipaileh venhim hna thawktu dangte puihna nen an lakah na takin kan che tan a. Mi firfiak 40 vel kah hlum an ni tawh,” tiin Pathianni khan Singh hian a sawi.
“Mi firfiakte hian ralthuam engmah nei ve lo civil mite an kap a ni,” a ti a. Heng mite hian Manipur inpumkhatna leh sorkar laipuiin state sorkar a puihna tihthuanawp an tum niin a sawi bawk.
Helho hian Pathianni zing dar 2:00 velah khan Imphal phaikuam chhehvela hmun nga lai an bei.
Sekmai, Sugnu, Kumbi, Phayeng leh Serou te a ni a. Hmun dangah pawh inkahna thlengin tute nge an nih hriat mai theih rih loh ruangte pawh khawlaia let reng hmuh tur a awm.
Sekmai-a inkahna bik hi chu tlaiah kha chuan a tawp tawh nia sawi a ni.
State khawpui, Imphal-a Regional Institute of Medical Sciences (RIMS)-a doctor-te chuan Phayeng-a inkahna thlenga hliam tuar mi 10 an enkawl thu NDTV hnenah an sawi.
Bishenpur district-a Chandonpokpi-a cheng lo neitu, kum 27, Khumanthem Kennedy-a chu silaimu tam taka kah a nih avangin a thi a, a ruang hi RIMS-ah lak a ni a. Thi dang pawh an awm rinna a lian hle a, Kennedy-a hian a nupui leh an fa sen a thihsan a ni.
Chief minister chuan Imphal phai chhehvela tun ni hnih liam ta chhunga civil mite beihna thleng chu ruahmanna fel tak nena chetna nia a lan thu a sawi a, a dem hle bawk a. Minister of State Nityanand Rai-a’n remna a awm theih nana Manipur a chamchilh lai a ni.
Kuki hel pawl 25 chuangin sorkar laipui leh state sorkar nen chet lak lohna tura inremna, suspension of operation (SoO) an ziak tawh a. SoO dan zam hnuaiah hian helho hi sorkarin a ruahmansak camp-ah an awm vek ang a, an ralthuamte chu kalh hnan a ni ang a, uluk taka endik ziah a ni bawk ang.
Union Home Minister Amit Shah chuan Manipur hi Thawhtanni hian a tlawh dawn a. Meitei leh Kuki te chu muanawm taka khawsa tura ngenin boruak a pangngai leh theih nan hma la turin a ngen.
Army Chief General Manoj Pande pawhin Inrinni khan a tlawh bawk a, Pathianni nen khan châmin venhimna dinhmun a enpui.
Imphal phaia cheng, Meitei leh tlangrama cheng, Kuki inkara buaina hi Meitei-ten Scheduled Tribes (ST) category-a tel ve an phutna atanga intan niin May 3 atanga buaina chhuakah mi 70 chuang an thi tawh.
Buaina a chhuah hnuah Manipur hmun tam takah internet tihthih niin ni 25 chuan internet an nei lo tawh a ni.