Pakistan hmar lama vur tawlh avangin mipa naupang kum li mi telin mi 11 vel an thi.
Tlangram, Shounter Pass-a a huhova an kel vulhte nen kawng an kal laiin vur tawlh hian a chhilh a ni.
Mi 25 vel hliam tuar an awm bawk a, chhanchhuah hna thawh nghal mek a ni.
Pakistan Prime Minister Shehbaz Sharif chuan thi chhungte a tawrhpui thu leh hetiang vur tawlh hi sik leh sa inthlak nasa avangin a tam niin a sawi bawk.
Vur tawlh hi Inrinni hma taka thleng niin Pakistan-in a awp chin Kashmir-a Gilgit Baltistan region leh Azad Kashmir nena an inrina, Astore district-a lei eng emaw zat awmna laia thleng a ni.
Thi zingah hian hmeichhe pali leh mipa naupang kum li mi an tel tih police officer Ziarat Ali chuan a sawi tih Associated Press news agency chuan a sawi.
Rescue team-te chuan a hmun hi a kilkhawr avang leh a kalkawng a chhiat em avangin thlen zung zung a har niin an sawi.
Tual chhung thuneitute pui turin sipaite an thawk chhuak a, sipai helicopter pahnih tirh an ni bawk a. Thil thleng hmutute chuan tual chhung mite pawhin vur hnuaia tangte chhanchhuah hna thawh hi an pui bawk tih an sawi.
Prime Minister Sharif chuan chhiatna thlengin ‘a tihlungngaih thu leh nunna hlu tak tak chân’ a ni chu pawi a tih thu Twitter-ah a tar lang.
“Sik leh sa inthlak nasa avangin hetiang hi Pakistan-ah a thleng tam zual a. Khawvel pum hian Pakistan ang, hetiang tuar na zual thei ramte ngaihtuaha hma an lak a ngai a ni,” a ti.