India rama eptu party hrang hrangte chu nakuma inthlanpui lo awm turah lungruala an tanho theih dan tur sawihovin June 12 hian Patna khawpuiah an thukhawm dawn.
He hunah hian eptu party 18 chuang an tel dawn nia sawi a ni a. Eptu party-a hruaitu hlun pakhat chuan he thutkhawm tur hi ‘preparatory meeting’ a nih thu a sawi a. “Main meeting chu nakinah la neih tur a ni ang,” a ti.
Eptuten thutkhawm tur an puan hi Pathiannia Prime Minister Narendra Modi-a’n parliament building thar a hawn an boycott nia puan a ni.
Eptute hian parliament building thar hi President Droupadi Murmu-i hawn ngei tur anih thu leh a chanpual niin an sawi.
“President chauh hi sorkar, eptu leh khua leh tui zawng zawng aiawhtu a ni a. First Citizen of India ani a. Parliament building thar hi sorkarin mipui rorelna hlutna leh danpui kalhmanga a hawntir ngei tur a ni,” tiin Congress chief Mallikarjun Kharge chuan Twitter-ah a tar lang.
Thutkhawm hun tur hi kum 2024 atana eptute tanhona tura inpea thawk, Bihar Chief Minister Nitish Kumar-a’n Delhi-a Congress chief leh Rahul Gandhi a hmuh hnua siam a ni.
Kumar-a hian eptu lam hawi deuh hrim hrim chu teltir vek a tum a. Mamata Banerjee, Arvind Kejriwal leh Samajwadi Party chief Akhilesh Yadav te chu Congress nen inmil lo mah se a hmin tawh.