Aizawl: Nimin khan India ram pumah Union Public Service Commission (UPSC)-in civil service preliminary exam a buatsaih a, Aizawla exam centre-ah chuan mi 900 bawr vel exam beitu awmin, an zingah hian Manipur atanga kal thahnem tak an tel.
Aizawl centre-a UPSC civil service preliminary exam buaipuitute hnen atanga thudawn danin Govt. Mizo Higher Secondary School leh Govt. Hrangbana College hall-ah te exam hi buatsaih a ni a, exam bei hi mi 900 bawr vel awmin an zinga mi 200 bawr vel chu Manipur Zofate an ni.
Civil Service preliminary exam bei tura Manipur tlangram atanga Kuki-Zomi-Hmar hnam kalte hi Imphal centre-a exam bei tura inziak lut tawhte an ni.
Manipur-ah chi leh chi inkara buaina leh tharum thawhna nasa tak a thlen tak avangin tlangrama chengte tan chuan Imphal centre-a exam chu thiltih theih a ni ta lo va. Mizoramah kalin Aizawl centre-ah an exam ta a ni. A then chu a huhovin bus hmangin an rawn kal a, a thente erawh chu mahniin an kal a ni.