Aizawl: All India Congress Committee (AICC) thupuangtu, Mathew Antony chuan kum kua zenzawn central-ah BJP a sorkar chhungin mipui hmaa an intiamna tihhlawhtlin mumal an nei lo tih sawiin, BJP sorkar hian zawhna chhan ngam loh tam tak a nei tawh tih a sawi.
Inrinni khan AICC ruahmanin India ram puma state zawng zawngah AICC aiawhten thu thar thehdarhtute an kawm a, Mizoramah pawh Congress Bhavan Media Hall-ah AICC Spokesperson Antony hoa neih a ni.
Antony chuan kum 2014 atanga central-a BJP-in sorkarna an siam a, kum kua zenzawn a sorkar chhungin India mipuiten harsatna nasa tak an tawk tih a sawi a. Khawvel ram dangte mithmuhah ropui tak anga inlantir mah se, BJP kaihhruaina hnuaia India ram hi a hnungtawlh zawkna a tam zawk tih a sawi.
AICC thupuangtu chuan sorkar hmasate nasa taka sawisel mah se, a sorkar chhung hian sorkar hmasate hmalakna tam tak chu a kalphung thlak chuang loin hming chauh thlakin anmahni tihchhuah ang deuhthawa sawi chungin a kalpui reng tho tih sawiin, “Thusawi thiam tak, Modi hian kum 2014 Lok Sabha inthlanpui campaign laia mipui hmaa a intiamna tihhlawhtlin mumal a nei lo,” a ti.
Antony chuan BJP-in kum kua a sorkar chung hian zawhna tam tak chhan ngam loh a nei a, chung zingah pakua ang chauh pawhin siamsak mah se BJP sorkar hian a chhang ngam dawn lo tih a sawi.
Antony chuan BJP sorkar hnuaia pawisa hlutna tlahniam leh hnathawh tur nei lo a san chhan te, sorkar company leh Prime Minister Modi thian thate hnena hralh a nih dan te, India ram lo neitute hamthatna tura dan siamte zawm loh dan te leh lo neitute sum lak luh tihpun a nih loh dan te, mipuiten rim taka an thawh chhuahsa LIC leh SBI-a dahte Modi-a thian tha, Adani hlawkna tura hman a nih dan te, China laka India himna derthawng mek te, India khawtlang nuna inhuatna chi tuh a nih dan te, hnam leh sakhua intluktlanna tihderthawna awm mekte leh hnam hnufual leh tlem zawkte nepchepna thleng mek te, India ram demicracy lungphum tinghing zawnga hma lak thinna te, hnam hnufual leh tribal te hamthatna tur sum tihtlem hret hret te leh Covid-19 leng avanga tawrhna leh eizawnna tawp mi nuai tam takte khaichhuahna tura ruahmanna siam a nih loh dan zawhnate chu BJP sorkar hian a chhang ngam lo niin a sawi.