Vawk pul hri, African Swine Fever (ASF) leng thawh thumna thleng leh mekah Mizoram khawchhak tlang dungah hri vang vawk 100 dawn a thi leh tawh.
The Zozam Times zawhna chhanga AH&Vety department hotuten an sawi danin, tunlai hian Champhai district chhunga khua leh veng thenkhat chu ASF lengin a tibuai mek a, department-in an finfiah chinah hri hian veng leh khaw panga a luhchilh mek.
Champhai district-a Ngur khua chu ASF hian May thla tir atang khan tibuai tanin hri vangin vawk 69 an thi tawh a, a darh zel tur ven nan vawk damlo 72 suat a ni tawh.
Khaw dang, Zote-ah ASF vangin vawk 12 a thi tawh a, a bak khua leh veng – Kelkang, Zion Veng leh Champhai Vengthlangah te vawk pakhat theuh a thi tawh a, tun hnaia Champhai district-a ASF vanga vawk thi chu 84 tling tawhin 72 suat a ni tawh bawk.
Heng vawk pul hri lenna hmun khua leh vengte hi infected are-ah puan ni tawhin, kar kalta khan vety doctor-te chuan tlawhin ASF vanga ran vulhtute harsatna tawh dante an zir chiang a, hri leng laka inven dante an zirtir.
ASF hi kum 2021 March thla atang khan Mizorama leng tan nia ngaih a ni a, December, 2021-ah thawh khatna hi a reha ngaih a ni a. Thawh hnihna chu March, 2022 velah intan lehin kum tawp lamah chuan ASF vanga vawk thi an awm mang tawh lo.
Vawk pul hri leng hi a ziaawm tawha ngaih a nih laiin tun thla tir lam atang khan khawchhak tlangdungah vawk thi a awm leh tan a, heng vawk thite hian ASF an kai ngei tih finfiah a ni a, thawh thumna hi thleng leh tana ngaih a ni.